Menu
Your shopping cart is empty.

Aasiaat radio angalasunut assigiinngitsunik kiffartuussisarpoq.

Sullissinermi frekvensit

  • VHF-ikkut oqarasuaateqarneq
    Aasiaat radio attavigineqarsinnaavoq ajunaalernermi sullissinermut atassuteqaat kanal 16 aamma sullissinermi kanali atorlugu.
    Uani VHF kanalit takukkit
     
  • MF-ikkut oqarasuaateqarneq
    Aasiaat radio sullissinermut frekvensitigut attavigineqartarpoq.
    Uani MF kanalit takukkit
     
  • HF-ikkut oqarasuaateqarneq
    Aasiaat radio attavivineqartarpoq sullissinermut nalinginnaasumik kanalini ITU atorlugu.
    Uani HF kanalit takukkit

Angalasunut nalunaarutit

Aasiaat radioata piffissani aalajangersimasuni sullissinermut frekvensimigut kanalimigullu nalinginnaasutigut angalasunut nalunaaruteqarfissat aallakaatittarpai. Taaguut angalasunut nalunaarutit nunarsuaq tamakkerlugu atorneqarpoq, atorneqartarlunilu angallatit attavigineqarnissaminnik naatsorsuutiginninngikkaluarpataluunniit.

Sinerissami nakkutilliineq

Umiarsuit 20 BT-nik taannalu sinnerlugu oqimaassusillit aammalu aalisariutit nunatsinni umiarsualiviit talittarfiillu akornanni angalasut, Sinerissami nakkutilliisoqarfimmut nalunaaruteqartartussaapput.

Nalunaaruteqarneq pisarpoq Aasiaat radioanut aallalernermi makkuninnga nalunaaruteqarnikkut:

  • Angallatip aqqa
  • Suminngaanniit aallarneq nalunaaqutarlu
  • Aqqutissaq
  • Piffik tikiffissatut ilimagisaq nalunaaqutarlu
  • Kiisalu issimasut amerlassusaat.

Ulloq unnuarlu ataaseq sinnerlugu angalaneq sivisussuseqarpat angallatip ikinnerpaamik ullup unnuallu ingerlanerani ataasiarluni sumiinnini nalunaarutigissavaa. Tikiffissatut naatsorsuutigisamut apuukkaanni, tamanna Aasiaat radioanut nalunarutigineqassaaq.

Nalunaaruteqarfissatut isumaqatigiissutigisami nalunaartoqanngippat annaassiniarnermut oqartussaasut kalerrinneqassapput.

Sinerissami nakkutilliinermut ilanngunnissamut kikkulluunniit nalunaarsinnaapput.

Anorersuarnissaanik, anorsarinnissaanik aammalu sermernarnissaanik aarlerisaarutit

Aasiaat radioata anorersuarnissaanik, anorsarinnissaanik aammalu sermernarnissaanik aarlerisaarutit DMI-meersut ataavartumik aallakaatittarpai.

Aarlerisaarutit tiguneqartut aarlerisaarutigineqartarput aasaappat ukiuuppallu kitaani nalunaaqutaq malillugu piffissani aalajangersimasuni ukunani 0605, 1105, 1605 aamma 2105. Piffissani aalajangersimasuni aallakaatitsinerit radiokkut attaveqarnaveersaarfiup kinguninngua 2182 kHz-ikkut aammalu kanal 16-ikkut oqalulluni kalerriutigineqaqqaariarlutik sullissinermut attaveqaatikkut atuarneqartarput.

Aarlerisaarutit, piffissat qulaani taaneqartut avataasigut aallakaatinneqartussatut tiguneqartut, MF DSC-iikkut (2187,5 kHz-ikkut), ajunaalernermi kalerrisaarinermut kanalikkut 2182 kHz-ikkut aammalu VHF kanal 16-ikkut kalerriutigineqaqqaariarlutik sullissinermut attaveqaatitigut kanalitigullu aallakaatinneqartarput aammalu aallakaateqqinneqartarlutik radiokkut attaveqarnaveersaarfiup kingorna nalunaaquttap akunnerata affaa qaangiukkaangat.

Anorersuarnissaanik, anorsarinnissaanik aammalu sermernarnissaanik aarlerisaarutit aammattaaq HF aamma NAVTEX atorlugit aallakaatinneqartarput.

Silamik ilimasaarutit

Imartanut silamik ilimasaarutit kiisalu ullunut pingasunut Nunap Isua-nut silamik ilimasaarutit piniarneqarsinnaapput KNR radio aqqutigalugu.

Kalaallit Nunaanni imartat assilinerat imartat immikkoortortaannik takutitassialik, takuneqarsinnaavoq una toorlugu.

Illoqarfinnut silamik ilimasaarutit pissarsiarineqarsinnaapput oqarasuaatikkut:

  • 153 (kalaallisut) aamma
  • 154 (qallunaatut)

Kiisalu illoqarfinnut silamik ilimasaarutit takuneqarsinnaapput uani DMI byvejr.

Sikunut tunngasut

Aasiaat radio ataavartumik nassiussuiffigineqartarpoq sikup assinginik sikullu killinginik nalunaarsukkanik Narsarssuarmi Iscentralen-iminngaanneersunik. Siku pillugu paasissutissat akitsuusigaanngillat.

Sikup assingi internetikkut DMI-mi takuneqarsinnaapput.

Siku pillugu nalunaarsuinerit NAVTEX-ikkut aammattaaq aallakaatinneqartarput.

Imarsiortunut mianersoqqussutit

Nalunaarutit, imaani isumannaallisaanermut tunngassut, piaartumik 'Efterretninger for søfarende’-mi nalunaarutigineqarsinnaanngitsut imarsiortunut mianersoqqussutitut Aasiaat radio aqqutigalugu aallakaatinneqartarput.

Aasiaat radioata imarsiortunut mianersoqqussutit tiguneranninngaanniit attaveqarnaveersaarfiup tulliup qaangiunnerani aallakaatittarpai, MF DSC-mi, ajunaalernermi sullissinermut atassuteqaat 2182 kHz aammalu VHF kanal 16 atorlugit kalerrisaarereernerup kingorna. Tamatuma kingorna angalasunut nalunaaruteqarnissanut ilaatillugit aallakaatinneqartarput.

Imarsiortunut mianersoqqussutit imartap imaluunniit imartat immikkoortuanut/-inut pisariaqartutut isigineqartut taamaallaat aallakaatinneqartarput.

Imarsiortunut mianersoqqussutit Navtex aamma aqqutigalugu aallakaatinneqartarput.

Nakorsamik siunnersorneqarneq

Inuttat ilaannik tassanngaannartumik napparsimasoqalersillugu annertuumilluunniit ajoqusertoqartillugu, nakorsamut attaveqartoqarsinnaavoq.

Angallatit sapinngisamik illoqarfimmi tikeqqaagassaanniittumut nakorsamut attaveqartinneqartarput.

Angallatinut paasissutissiinerit

Kalaallit Nunaata imartaanut appakaattunut imaluunniit tamaani angalasunut:

Assersuutigalugu takujuk: http://www.dma.dk/SikkerhedTilSoes/Arktis/SejladsGroenland/Sider/default.aspx