Menu
Your shopping cart is empty.

Piffinni mobiltelefonimit anguneqarsinnaasuni angalaaraluaraanniluunniit angallammi VHF-eqarneq pitsaanerujuaannarpoq.

Angallammi VHF-radioqaraanni makku pineqarsinnaapput:

  • Annaassiniarnermi oqartussaasunut attaveqarneq
  • Angallatit qanittumiittut attavigineqarsinnaanerat
  • Silassamik aarlerisaarutit pissarsiarisinnaanerat
  • Silap qanoq innissaanik paasisaqarsinnaaneq
  • Sikunik nalunaarutisisinnaaneq
  • Imarsiortunut mianersoqqussutisisinnaaneq
  • Umiarsuarnik nakkutilliivimmik atuisinnaaneq
  • Angerlarsimaffimmut sianersinnaaneq
  • Pisariaqassappat nakorsamit ikiorneqarsinnaaneq

Ajornartorsiuleraanni angallammilu VHF-eqarluni, atortumik misilinneqartareersumik atortoqarluni attaviginnittoqarsinnaavoq, annaassiniarnermummi oqartussaasut angallatillu allat qanittumiittut aammalu radioqarfiit qanoq iliortoqarnissaanut periaasissaqarput aalajangersimaqqissaartunik.

VHF-radiolli iluaqutigineqarnissaanut ajornartorsiortoqartariaqanngilaq. Angallatit allat qanittumiittut oqaloqatiginissaat aamma pisariitsunnguuvoq.