Menu
Your shopping cart is empty.

03/11/2017 - 13:33

Kalaallit Nunaanni angallattakkanut attaveqaatit annertuumik nutarterneqarnissaat pillugu suliffeqarfissuarmik teknologiimik suliaqartumik Ericssonimik suleqateqarnissamik TELE-POST ullumikkut atsioqateqarpoq.

TELE-POST-ip Ericssonillu Kalaallit Nunaanni tamarmi attaveqaateqarnermut teknologii aammalu antennenut atortut ledningeqanngitsut 2018-imi atorneqalernissaannik suliaq aallartissavaat. Pilersaarut Mobile Firstimik taaguuteqarpoq, taassumalu Kalaallit Nunaanni angallattakkanut attaveqaatit Silarsuarmi pitsaanerpaanut akuutilissavai.

- Teknologii ledningeqanngitsumik ingerlasoq atorlugu, sullitatta, aamma illoqarfinni nunaqarfinnilu minnerusuniittut, internetimik atuineq sukkaneq atugarilissavaat, pilersaarutillu tamanna siunertaraa. Kalaallit Nunaanni tamarmi teknologiimik pitsaanerusumik atugaqalersitsinissaq TELE-POST-ip anguniagaraa, pilersaarullu manna tamatuma ilagaa pingaarutilik, TELE-POST-imut siulersuisut siulittaasuat Stine Bosse oqarpoq.

Attaveqaatinut kabelit aqqutigalugit qangali atorneqartunut unammillersinnaasut attaviit ledningeqanngitsumik ingerlasut nutaaliaasullu atorneqalernissaat, pilersaarummi matumani siunertaavoq. Nunatut Kalaallit Nunaattut ittumi, nunarujussuarmi isorartoqisumi agguataarlutik mikisunik inoqarfippassualimmi, teknologiip ledningeqanngitsumik ingerlasup atorneqarnissaa soorunami piumaneqarnerussaaq. Pilersaarut nunami tamarmi malugineqarsinnaassaaq, aamma nunaqarfinni, taakkumi siulliit ilagalugit teknologiimik iluaquserneqartussaapput.

- Sullitatsinnut aammalu inuussutissarsiummik ingerlatalinnut angallattakkanut attaveqaatit sapinngisamik pitsaanerpaat atugassaritinniassavagut. Kalaallit Nunaannili nunap pissusaata unammillernartuunera sumiiffimmiillu sumiiffimmut isorartunerujussua pissutigalugit, taava qaffasissumik pitsaassusilimmik attaveqaateqarneq pisariaqartinneqarpoq. Pilersaarut ukiorpannilu Ericssonimik suleqateqarnissarput qilanaaraarput, TELE-POST-imi pisortaaneq Kristian Reinert Davidsen oqarpoq.

Ericssonimut pilersaarut manna allaanerullunilu soqutiginarpoq, ilinniutigisinnaavaammi silarsuarmilu allami assingusunik suliaqarnerminni atorsinnaassallugu.

- Pilersaarut Mobile First pissanganartuuvoq, Kalaallit Nunaammi sorpassuartigut nunaavoq immikkut ittoq, aammalu angallattakkanut teknologiimi periaatsit nutaat Silarsuarmi allami takussaarpianngitsut maani annertuumik atussagatsigit. Isumaqarpugut tamanna assut soqutiginassasoq aammalu suliffeqarfitsinnut allannguutaasunik paasisaqarfiussasoq. TELE-POST suleqatigalugu aammalu angallattakkanut teknologii nutaaliaasoq iluaqutigalugu nunarujussuaq manna akimorlugu attaveqaatit sakkortusassavagut, Ericssonip Nunanut Avannarlernut aammalu Europap Qeqqanut immikkoortortaqarfianut pisortaq Per Narvinger oqarpoq.

 

Allanik paasisaqarumaguit uunga attaveqarsinnaavutit Attaveqaqatigiinnermut pisortaq Arnakkuluk Jo Kleist, mobil +299 547854, ajk@telepost.gl.