Menu
Your shopping cart is empty.

25/01/2019 - 16:08

Imaatigut kabelip kittorartoornera pissutaalluni sullittakkat Maniitsup avannaaniittut Kullorsuaq tikillugu internetiat kigaappoq.

Pisoq tamanna pisortaanermit Kristian Reinert Davidsenimit ilungersunartutut isigineqarpoq. Sullittakkat pitsaanerpaamik attaveqarnissaat qulakkeeriarlugu, naak pissutsit taamatut ikkaluartut, taava ajornartorsiornermi isumannaallisaanermut suleqatigiinnik pilersitsivoq, taakualu attaveqaatit pitsaanerulernissaat ilungersuutigalu sulipput.

- Taamatut pisoqarnera ilungersunartutut isigivarput, taamaattumillu ajornartorsiornermi suleqatigiinnit pilersitsivunga, tassani peqataapput aqutsisut aamma sulisut pingaarutillit ataatsimoortut. Ullut tamaasa ataatsimiittarpugut qanoq pisoqarnera nalilersorniarlugu, ataqatigiissaarilluta aamma iliuusissat assigiinngitsut tulleriiaarniarlugit. Taamaaliornitsigut unamminartut ingerlaavartumik nakkutigaavut, pisortaaneq Kristian Reinert Davidsen, oqarpoq.

Naak taamatut ajutoornermik pisoqaraluartoq TELE-POST-imut annertuumik sunniuteqartumik upalungaarsimanermut suleqatigiissitat pisoq suliarivaat, ilaatigut upalungaarsimanermut pilersaarutinik pisumut tamarmiusumut tunngatillugu suliaqarnermikkut. Imaatigut kabelip kittorarneranut aamma qanoq ineriartorneranut tunngatillugu TELE-POST-ip sullittakkani ingerlaavartumik ilisimatittarniarpai.

- Qanoq pisoqarnera ullut tamaasa malinnaaffigaarput sapinngisatsinnillu attaveqaatit nalinginnaasumik ingerlalernissaat pilertornerpaamik iliuuseqarfigalugit, naak uagut ilisimagaluarlutigu pisup sivikitsuunissaa naatsorsuutigisinnaanatigu, Kristian Reinert Davidsen oqarpoq.

Kujataani imaatigut kabelip kittorarsimanerata kujataani sullittakkat sunniuteqarfigiunnaarpai, tassa tassunga nassiussisarneq Island aqqutigalugu tamarmi ingerlammat. Kisianni Nuup avannaani imaatigut kabeli kittorarpat, taava ingerlatsineq tamarmi sakkortusaaviit aqqutigalugit ingerlanneqartussaavoq.

- Tamanna imatut assersuunneqarsinnaavoq aqqusineq sioqqamik qalligaq aqqusinersuarmut katinneratut, tamatumalu soorunami sumiiffimmi eqqorneqartumi internetip sukkassusia annertuumik killilissavaa, pisortaaneq oqarpoq.

Umiarsuaq imaatigut kabelilerisoq

Ilungersuutigalugu sulissutigineqarpoq umiarsuarmik iluarsaasussamik isumaqatigiissuteqarnissaq. Isumaqatigiissuteqarneq tamanna iluatseriarpat, taava erseqqissumik qaqugu kittorartoorsimanerup iluarsaanneqarnissaanut tunngatillugu nalunaaruteqarumaarpugut.