Menu
Your shopping cart is empty.

29/01/2019 - 19:15

Umiarsuaq kujataani avannaanilu imaatigut kabelinik aaqqissuisussaq Canadamiit februarip qeqqani avalassaaq. Umiarsuaq aallartinnani piareersarneqaqqaassaaq nunatsinni issittumi sulisinnaalersillugu. Aamma kujataani aaqqissuinissaa immap naqqani 3 kilometerinik ititigisumi sulisinnaanissaa qulakkeerniarlugu.

Umiarsuaq nuummukaqqaassaaq imaatigut kabelip kingoraartissaanik aallerluni, kingorna Sisimiup kujataanut imaatigut kabeli aaqqikkiartussavaa.

TELE-POSTip naatsorsuutigaa imaatigut kabelip aaqqissuunneqarnera marsip qeqqani piareerneqassasoq.

- Imaatigut kabelip suliarineqarnera kinguaattuunginnissaa soorunami pingaartsipparput, atuisutta attaveqaatitik sukkasuut utertipallanniassammassuk, TELE-POSTip pisortaanera Kristian Reinert Davidsen oqarpoq.

Imaatigut kabelip kujataani aaqqissuunera

2018-mi decebarip 27-ani TELE-POSTip imaatigut kabeli kujataaniittoq ajoquteqarnera paasivaat.  Ajoqut peqqutaalluni atuisugut attaveqaatai kigaassimapput, attaveqaatillu Islanditigut ingerlalermata tamanna aaqqippoq. Tamanna massakkut kujataani atuisunut attaveqarniarnermut sunniuteqarani, taamaammat Sisimiut kujataani imaatigut kabeli aaqqinneqarnissaa siulliupparput. Umiarsuaq Canadameersoq avannaaneereeruni kujammut imaatigut kabeli aaqqissuukkiartussavaa. Apriilillu aallartissimalernerani aaqqinneqarsinnaanera TELE-POSTip naatsorsuutigaa.

Atuisuuffinnut akiliineq

Attaveqaatit ajoquteqaraangata TELE-POST naliginnaasumik akiliutinik taarsiineq ajorpoq, tamanna kiffartuusinermut malitassani allaqqavoq. Maannakkulli atuisunut avannaaniittunut pisoq TELE-POSTip aqutsisuisa allarluinnartut nalilerpaat.

Maannamullu aamma paasineqarpoq imaatigut kabelip suliarineqarnera qaammatit marluk missaani sivisussuseqassassoq. Taamaammat TELE-POST aalajangerpoq atuisut sukkanermik Tusass internetteqartut Sisimiuniit Upernavik ilanngullugu taarsiiffigineqassasut.

Taarsiiffigineqartussat atuisuuffii tassaapput Tusass internet annerit 10/2 Mbit aamma 30/2 Mbit-mik sukkassusillit. Taakku 1.099 koruuninik aamma 1.199 koruuninik qaammammut naleqarput, taarsiiffigineqartussallu qaammatini imaatigut kabeli ajornerani Tusass internet minnerup 2/1 Mbit 499 koruunip nalinga akilertassavaat.

- Soorunami ajuusaarutigeqaarput sukkassutsit tunniuttakkagut maanna tunniussinnaanginnatsigit, taamaammat immikkuullarissumik aalajangerpugut atuisut taarsiiffiginiarlugit, taamaalillutik Tusass internetimut atuisuuffik minnerpaap nalinga piffissami tassani kisiat akilertassallugu, pisortaaneq Kristian Reinert Davidsen oqarpoq.

Akimik utertitsineq atuisunit januaarip 31-ani takuneqarsinnaanavianngilaq, periarfissarli siulleq atorlugu aningaasat utertussat atuisunut utertinneqassapput.

Imaatigut kabeli aaqqissuuneqarnera malinnavigiuk

TELE-POST nittartakkamik imaatigut kabelip aaqqissuunissaanut nutaarsiassanik imalimmik sanavoq, taanna tamani malinnaavigineqarsinnaavoq, aamma sms-kkut malinnaaniaraanni ilaasortanngortoqarsinnaavoq, nutaarsiassaqaraangallu allagarsisoqartassalluni. Taanna uani takuuk: https://telepost.info/

Apeqqutissaqaruit attaveqaqatigiinnermut immikkoortortaqarfimmi sulisoq Paarnaq Hansen saaffigiuk, mail panah@telepost.gl imaluuniit oqarasuaatitigut +299 563376