Menu
Your shopping cart is empty.

01/10/2019 - 17:00
TELE-POST Ane Lone Bagger Skype Kangaamiut børn
TELE-POSTip nunaqarfiit atuarfiinut attaviit sukkasuut atulersilerpai. Kangaamiut atuarfiani ullumi TELE-POSTimiit attaveqaatissap modemiata attaveqarneq nunaqarfimmi meeqqanut ilinniartitsisunullu sukkassutsimik periarfissiissaaq. Ima paasillugum maanna videotigut skypetigut toqqaannarluni attaveqaatit atorlugit avammut attaveqarsinnaalerput.

Attaveqaat ullumi misilinneqarpoq, toqqaannartumik skypekkut Ilinniartitaanermut, Kultureqarnermut Ilageeqarnermut Nunanullu Allannut Naalakkersuisoq Ane Lone Bagger Kangaamiut atuarfianiit 40-nik atuartulimmi attavigineqarluni atuisunut attaveqaat nutaaq pilluaqqussutigimmagit.

TELE-POSTimit nunatsinni nunaqarfinnut attaveqaatinik qulakkeerinninneq Naalakkersuisunit nuannaarutigineqarpoq. Attaveqaatit sukkanerusut kingunerissammassuk ilinniartitsinermi avammut attaveqarnissamut periarfissat amerlanerit ammaanneqassammata.

  • Kangaamiuni ilinniartut ilassillugit nuannerpoq, meeqqat attaveqaatitigut periarfissaqarnerulernertik nuannaarutigigaat takullugu nuanneqaaq. Kangaamiormiunut periarfissaavoq pitsaalluinnartoq, nunattalu sinneranut attaveqaatit siaruarnerisigut aammattaaq periarfissiissutaalluarluni.

TELE-POST sukkanerusumik attaveqaasersuinerminnut nunatsinnut ataavartumik avammut attaveqariaatsimut periarfissiivoq, nunaqarfinniit avataaneersut attavigineqalersinnaanerat pillugu, meeqqanullu nunarsuarmut ammaassisuuvoq,

 Ilinniartitaanermut Kultureqarnermut Ilageeqarnermut Nunanullu Allannut Naalakkersuisoq Ane Lone Bagger oqarpoq.

Namminersorlutik Oqartussat suleqatigalugit TELE-POSTimit internetikkut attaveqaat ATTAT meeqqat atuarfiinut, inuussutissarsiornermut ilinniarfinnut aammalu ilinniaqqiffiusunut attaviliisuusarpoq. Attavik taanna killiligaavoq periarfissaqareerluni iserfissanut ataatsimoorlunilu maileqartitsisuulluni. Maannali attaveqaat ATTAT atuarfiillu sukkanerusumik atorneqarsinnaalissapput.

  • Tulluusimaarutigaara attaveqaatitigut inerisaanitsigut kommunit akimorlugit meeqqat atuarfinni periarfissaqarnerulersikkatsigit suleqatigiinnerulersitsilluta, nunaniillu allanit periutsit atorsinnaaleratsigit. Iliuusissatut pilersaarutitsinni ilaareerpoq, piviusunngortipparpullu, TELE-POSTimi Pisortaaneq Kristian Reinert Davidsen oqarpoq, TELE-POSTimi, TELE-POSTimi Namminersorlutik Oqartussani Kommuninilu sulisut suleqatigiissimanerannut piviusunngortitsillutillu nersualaarlugit.
  • Sumiiffimmiit allamit ilinniartitsineq pisariunerulissaaq, periarfissanillu atuartunut ilinniartitsisunullu ammaassissalluni, soorlu atuartitsinermi nutarsaanermut ilinniaqqinnissamullu ammaassinermut.  Luutiveeraq Lyberth suliamut aqutsisuusoq, TELE-POSTimiit taama oqarpoq.

Nunaqarfiinni attaviit siornatigut sukkassusaa 2Mbit/s-voq. Maanna inerisaanikkut sukkanerusumik attaveqartoqalissaaq, allaat sukkassuseq 50 Mbit/s anguneqarsinnaalerluni. Tamassumunnga periarfissaalersumut peqqutaavoq TELE-POSTimiit attaveqaatai nunaqarfinni 4G aqqutigalugu sukkanerusumik interneteqalersitsimmat, taamaalilluni modem atorlugu nunaqarfinni atuarfiit sukkanerusumik attaveqalersinnaallutik.

Nunaqarfiit 54-sit nuna tamakkerlugu qaammatini tulliuttuni iserfissanik killilersugaasunik modeminik pissapput, Qeqqata Komunniani nunaqarfiini ikkussuineq aallartereerpoq, Avannaata Kommuniani nunaqarfinnut ikkussuineq tullinnguulluni. ATTAT aqqutigalugu attaveqaatit sukkanerit immap naqqatigut kabeleqarfinni sakkortusaaveqarfinnilu nunaqarfinni periarfissaalissapput. TELE-POSTimiillu satellitsitigut attaveqarfiit ineriartortinnissai suliniutaapput, teknologilu allarluinnaammat periarfissat allaanerussallutik.

 

Paasissutissanik apeqqutissaqaruit attaveqarfissaq aana:

TELE-POST

Attaveqaqatigiinnermut pisortaq Julie Rademacher, julie@telepost.gl, oqarasuaat: +299 26 35 35.

Kangaamiut - Luutiveeraq Lyberth tlf. +299 591286.

Ilinniartitaanermut, Kultureqarnermut Ilageeqarnermullu Naalakkersuisoqarfik

Nalakkersuisumut allatsi Rosa Thorsen +299 553303