Menu
Your shopping cart is empty.

02/12/2019 - 17:25

Upernavimmi eqqaanilu immikkukajaaq silarlussuaqattaarpoq, sakkortusaavinnut akornusersuutaaqisumik. Issangiarluni sermernartumillu masannartuliortumik nittaalarnerata, antennet, parabolet atortullu allat sermimik pooqqatiterpai.

Telemi teknikerit Upernaviup eqqaani qaqqap qaavani sakkortusaavimmut  SAHO-mut apuunniassallutik ulluni arlalinni piareersimasimapput. Ippassaq silarlussuaq kiisami inoriaqquumimmat sulisut timmisartuaqqamik qulimiguulimmik qaqqap nuuanut apuunneqarsinnaasimapput.

TELE-POST-imi Teknik-mut aamma IT-mut pisortaq, Jonas Hasselriis oqarpoq:

- Attaveqaatit attaveqaqqilersinniarlugit assut ilungersorsimavugut, assinilu takuneqarsinnaasutut qaqqat nuuini silapilunnersuanik assut annakannajaartinneqarsimalluta.

- TELE-POST-imi sulisutta aamma pisiniarfigisartakkatta AK Montage-mi sulisut immikkorluinnaq iliuuseqarnerisigut attaveqaqqilerneq iluatsippoq, tassa taakku sapinngisartik tamaat, sillimaniarnikkullu illersorneqarsinnaasumik atortuutivut sermiiarmatigit.

Upernaviup kujataani sakkortusaaveqarfiit marluk silapilunneranik suli attaveqanngillat, taamaattumillu teknikerit suleqatigiit aaqqissuiartortillugit aallartinneqarput, attortut attaveqaleqqinnissaannik isumannaarisussat. Nunaqarfik Innaarsuit aamma attavilerneqaqqissaaq, timmisartuussisoqaqqissinnaalernissaali utaqqeqqaarneqassalluni. Sullitatta tamarmik attaveqaqqilernissaat qulakkeerneqassaaq, piffissamili killilimmi silapilummik sakkortusaaviit atassutaarunneranni attaveqannginnermut taarsiiffigitsittoqarsinnaassanngilaq, soorluli imaatigut kabelip aaqqissuunneqarnerata nalaani sullitavut taarsiiffigineqarsimasut.

Ilanngullugit kakkiuppavut assit marluk AK Montage-ip sulisuisa assilisaat, Upernaviup eqqaani sakkortusaaviup SAHO-ip attaveqarteqqilerniarnerani immikkorluinnaq sulinermit assilisat.

Sukumiinerusumik paasisaqarusukkuit attavigiuk: Attaveqaqatigiinnermut pisortaq Julie Rademacher, email julie@telepost.gl, mobil +299 263535