Menu
Your shopping cart is empty.

23/06/2020 - 13:26

KNR, Naalakkersuisut aamma TELE-POST – Suleqatigiinnerup iluatsilluartup Kalaallit Nunaat tamakkerlugu HD TV-qalersippaa.

HDTV-qalerneq - Kalaallit Nunaanni TV-qarnermi alloriarneq pingaaruteqarluinnartoq - Naalakkersuisut, TELE-POST-ip aamma KNR TV-p suleqatiiillutik ullorsiornitsinni 21. juuni 2020, nunatsinni isiginnaartartut nuannaarutigisaannik atulersippaat.

Karl Frederik Danielsen, Ineqarnermut Attaveqaqatigiinnermullu Naalakkersuisoq ima oqaaseqarpoq:

- TELE-POST KNR-ilu suleqatigiilluarnitsinnut qujassuteqarfigivagut, piffissami nalinginnaasumik ataatsimoorsinnaanngiffitsinni, nuna tamakkerlugu teknikkikkut iluarsiissummik ataqatigiilersitsisumik assillu ersarissusaannik pitsannguisumik tunniussinitsinni. Ullumikkut siunissamilu, innuttaasut misigisaannik pitsanngorsaanissamut aningaasaliisinnaanerput nuannaarutigaarput. Angusaq annertuvoq, nunarujussuatsinni najugaqarfiit tamakkerlugit angusinnaagatsigit, allaat assi HD-mik pitsaassusilik atorlugu.

TELE-POST-imi pisortaaneq Kristian Reinert Davidsen ima itisiliivoq:

-Nunarujussuarmi silarluttaqisumi innuttaasut, imminnut ungasissuni najugaqartut, tamakkerlugit atassuserniarlugit aningaasaliinerit qaqqanilu teknikkikkut iluarsiissutit immikkut ittut atorfissaqartinneqarput. Taamaattumik sulisutta tamanna isumannaarsimammassuk, pilersaarutillu malillugit ullorsiornissatsinnut naammassisimammassuk, tulluusimaarutigaarput – tamanna pisinnaasimavoq Naalakkersuisut KNR-illu suleqatigilluarnerisigut.

KNR-imi akipput, Naalakkersuisut TELE-POST-ilu suleqatigiilluarnermut qujaffigalugit, imatullu nalunaarlutik:

- Ullumikkut nunatsinni isiginnaartartunut ulloq immikkuullarippoq; KNR TV kanal 1 HD-imik pitsaassuseqalerpoq.

Ilinnut isiginnaartartumut tamanna ima isumaqarpoq, TV-kkut attaviit KNR 1-p assiliartaa marloriaammik pitsaassuseqarnerulersoq. HD erseqqarinnerummat attavik immikkuualunnerusumik assitaqarpoq kiisalu qalipaatinik, mikisuaqqanik aalasunillu takutitsisinnaanera pitsaanerulluni. Naatsumik oqaatigalugu fjernsynit ullutsinni anginerusut pitsaanerusumik assitaqalerput. Aallakaatitat toqqorsivimmeersut nutaanngitsut pitsaanerusumik assitaqarneri malunnarpallaassanngillat SD-ugamik nutaanngitsut. Kisianni TV-kkut aallakaatitassiat nutaat, soorlu timersornerniit aallakaatitassiat malunnaatilimmik pitsaanerulissapput.

2009-mi Kalaallit Nunaanni digitalimik TV atulersinneqarpoq. Taamanikkut HD-mut nuussimasuugutta nuna tamakkerluni nunatsinneersunik marlunnik DR-imeersunillu pingasunik kanaaleqarsimassanngikkaluarpoq. Nuna tamakkerlugu TV-mi aallakaatitassiat siammarterneri suliarujussuuvoq, 2.1 mio. kvadrat kilometerimi anguneqartariaqarmat – Qaanaaq, Ittoqqortoormiit aamma assersuutigalugu savaatillit satellitsikkut TV-qarput siornatigut Danmarkikkooqqaartariaqartumik Kalaallillu Nunaannut uteqqaartariaqartumik. Naalakkersuisut TELE-POST-ilu isumaqatigiillutik TV-p siammarternera teknologii nutaaq atorlugu nutaanngorsarpaat.

Uani HD-p SD-llu assigiinngissusaat takusinnaavat:
https://youtu.be/N-ikYsKfzVo

Assimi kakkiussami assigiinngissuseq takuneqarsinnaavoq; assimi mikinermi nutaanngitsoq assimilu anginermi HD-mik pitsaassusilik.

 

Sukumiinerusumik paasisaqarusunnermi attavissaq: TELE-POST-imi attaveqaqatigiinnermut pisortaq Julie Rademacher, email: julie@telepost.gl, mobil: 263535