Menu
Your shopping cart is empty.

03/12/2020 - 13:37

Tasiilami nunami stationeqarfiup nutaap nappaanersiorneqarnera, Kommuneqarfik Sermersooq suleqatigalugu Naalakkersuisuniillu kiisalu qaammataasakkoorlugu attaveqaqatigiinnermik nutaamik nunani tamalaani pilersuisumit SES-imit peqataasoqarluni, Tele Greenland A/S-ip isiginnaarut aqqutigalugu nalliuttorsiutigaa. Sisamanngorneq ulloq 3. december Tasiilami nunaqarfiinilu innuttaasunut tamanut ulloq pingaartorsuuvoq. Tasiilami nappaanersiornissarsuaq pilersaarutaasimagaluarpoq, Covid-19-imilli peqquteqartumik, tamatumalu kingunerisaanik killilersuisoqarneranit, nappaanersiorneq maanna internetsikkut ingerlanneqartariaqarpoq. Qaammataasakkoorlugu attaveqaateqartuni internetsimut atuisuuffeqarnerit pitsaanerulernissaat Tele Greenland A/S-ip sulissutigeqqittuarpaa, Tasiilamilu 2021-p ingerlanerani taamatut sulinerit piariissapput.

Qaammataasakkut attavillit internetsiisa pitsaanerulernissaannut alloriarneq siulleq 

Ukiuni tullerni aggersuni attaveqaasersugaanerup pitsaaninngortinnissaa annertusarnissaalu Tele Greenland A/S-ip anguniagaraa, tassalu 2020-mi Tasiilaq, 2021-mi Ittoqqortoormiit 2023-milu Qaanaap/Pituffiup eqqaani, aatsitassarsiorfinni aammalu savaateqarfinni. Nunami issittumi isorartoqisumilu silap pissusaanik imaannaanngeqisumik atugaqarfiusumi nalunaarasuartaatitigut attaveqaasersuineq immikkut illuinnartunik piginnaaneqarfiusariaqarpoq. Taamaattumik Tele Greenland A/S-ip Pisortaanera Kristian Reinert Davidsen ima erseqqissaateqarpoq: 

- Qaammataasakkut attaveqarnermi periarfissat pitsaanerpaagaluarunilluunniit, imaatigut kabeleqarfinni sullitat misigisaasa assinginik misigititsisinnaassanngillat, qaammataasakkoorluguli attaveqaateqartuni sullitagut internetsimi piginnaasamik ullumikkornit pitsaanerungaartumik atugaqalernissaannik qulakkeerunniarlugit ilungersorpugut, tamannalu pivoq ilaatigut Kommuneqarfik Sermersuumik suleqateqarluarnerput pissutaalluni. 

Kommuneqarfik Sermersuumi borgmesteri Charlotte Ludvigsen suleqatigiilluarneq kommunep akuuffigisaa pillugu ima akissuteqarpoq: 

- Kommune nalinginnaasumik internetsimik isumaginnittussaanngikkaluarpoq, internetsilli periarfissat tunniussinnaasai innuttatsinnit atunngitsoorneqarnerat kommunalbestyrelsemi isiginngitsuusaaginnarsinnaasimanngilarput. Immikkut nuannaarutigaakka internetsip pitsaanerusup atuarfimmi tunniussinnaasai. Tasiilami meeqqat, kommunep sinnerani atuartut assigalugit, maanna iPad-it atorlugit atuartinneqarsinnaalissapput. Nangipporlu: 

- Internetsi Tasiilami sulisutsinnut annertoqisumik aamma pingaaruteqarpoq. Sulianik suliarinninnermut nutaaliaasumut sukumiisumullu atortut eqqortut maanna atortorilissavaat. Tele Greenlandip suleqatiginera assorsuaq nuannaraarput. Assigiimmik anguniagaqarluta suleqatigiikkutta suut angusinnaallutigit takkullugu nuanneqaaq.

Nunami stationeqarfiup nutaap Tasiilamilu antennip pioreersup nutarternera ullumikkut ersiutaavoq Tele Greenland A/S-ip suleqatigisaasalu aammalu Tasiilami suliffeqarfiutillip akornanni sulilluarsimanerujussuarmut, suleqatigiilluarsimanermut ilungersuullugulu sulisimanermut. Ullumikkut pisut pillugit Tele Greenland A/S-ip Pisortaanera Kristian Reinert Davidsen ima oqarpoq:

- Tasiilami nunaqarfiinilu sullitagut tamaasa pilluaqqujumavagut, minnerunngitsumillu ilungersunartunik atugassaqartaraluarlutik suleqataasimasunut qujanarujussuaq nunap ilaani qaammataasakkoorlugu attaveqaatilinni nalunaarasuartaatitigut attaveqaateqarnerup nutarterneqarnerani alloriarnermut siullermut peqataasimanerat pillugu. 

 

PIVIUSUT ALLATTORSIMAFFIAT 

Qaqugukkut pisut teknikkimullu tunngasut

Tasiilami suliassaq sivisuumik piareersarneqarpoq. Geo-stationære satellit-inut (SES)  qaammataasakkoorlugu attavinnik pilersuisumik isumaqatiginninniarnerit 2019-ip naanerani naammassineqarput. Tasiilami nunami stationeqarfimmik pilersitsinissamut piareersarnerit 2019-ip ukiaani aallartinneqarput, tassungalu malitsigalugu ukioq manna juulip qiteqqunneraniit attaveqaatinik nutarterinermik aammalu attaveqaasersugaanermik annertusaanermik. Septemberip aallartinnerani Tasiilami innuttaasut nunami stationeqarfik radome ammalortoq ilisarnaqqissaartoq takusinnaalereerpaat.   

Tasiilami nalunaarasuartaatitigut attaveqaasersugaaneq pitsaanerusoq  

Nunami stationeqarfimmik sanaartorneq ingiaqatigalugu, Tasiilami nalunaarasuartaatititugt attaveqaasersugaaneq aammattaaq pitsanngorsaavigineqarpoq:  

mobilinut attaveqaat annertusineqarpoq

Tasiilap illoqarfiani namminermi fiberi atorlugu attaviit amerlanerit 

Nunaqarfinnut attavinnik annertusisitsinerit  

Qaammataasami kaaviiaarnerit tamarmik nuussorneqarput qaammataasami piginnaasap tamakkiisumik atorluarneqarnissaa qulakkeerumallugu  

Signalimik pitsanngortitsineq 

Radomep anorimut silarlummullu aammalu attaveerussinnaaneranut (fading) isumannaarnera   

Sulilluarnerujussuaq naak Covid-19-imik tuniluunnersuaqaraluartoq 

Nunami stationeqarfimmik pilersitsineq suliaavoq ullualuinnannguani naammassineqarsinnaanngitsoq. Suliassarujussuuvoq Kalaallit Nunaanni, Danmarkimi Tuluillu Nunaanni piffissarujussuarmik nukippassuarnillu atuiffiusoq, tassami pilersaarusiorfiunerata nalaa Tasiilamilu sanaartornermik suliaqarnertaa assorsuaq tatineqarpoq Covid-19 nunarsuarmi tamarmi siammalillarmalli. 

 

Tasiilami sullitanut ilisimatitsissut

Tasiilami Tusass-imik atuisut ullumeqqissaaq 3/12 -2020 internetsimik pitsaavallaanngitsumik misigisaqarsinnaapput, qaammataasakkut nassiussukkanik Tasiilami tigooqqaavimmik nutaamik atoqqaartitsinermi. Tamanna Tasiilami sullitatta datanik nutaanik tigusilluarsimanerannik kiisalu qaammataasakkut attaveqarnermut pitsaanerusumut nutaamullu suli nuuttoqannginneranik  peqquteqarpoq. TELE-POST-imit nuannaarutigaarput Tasiilami datat nutaat sullitarpassuatsinnit nuannaarutigineqarmata, kaammaattuutigiinnassavarpullu sullitatta datat nutaat pissarsiatik siunissami aggersumi soorlu juullimi atussagaat, maannakkuunngitsorlu – maannakkummi qaammataasakkut attavimmut pitsaanerusumut suli nuuttoqanngimmat. Ullumikkut nunami tigooqqaavimmik Radomersuarmillu nappaanersiortoqarpoq. 2021 aallartilaarpat qaammataasakkut attaveqarneq pitsaanerusoq atulissaaq.

 

 

 

 

Paasisaqarnerorusunnermi attavissaq: Tele Greenland A/S-imi Attaveqaqatigiinnermut pisortaq, Julie Rademacher Mobil +299 352626 Mail: julie@telepost.gl