Menu
Your shopping cart is empty.

11/03/2021 - 14:52

TELE-POST-ip Coding Class Kalaallit Nunaannut 2020-mi eqquppaa. Atuartuutigut digitaliseeriinermik kodiinermillu ilinniarput, Kangillinnguit Atuarfiannilu iluatsilluartumik ingerlatsinerup malittaatut TELE-POST-ip maanna Coding Class Kalaallit Nunaanni Meeqqat Atuarfiini arlalinni ingerlattussanngorpaa.

TELE-POST Kommune Kujallermik Kujataani Meeqqat Atuarfiinut Coding Classimik upernaamut tikiusseqataasussamut suleqatigiinnissamik isumaqatigiissuteqaqqammerput. Tanja Christensen, Piujuaannartitsinermut siunnersorti Maniitsumiit ima oqarpoq:

-Coding Classimik ingerlatsinissamik pilersaarutip ineriartornera nuannaarutigeqaara, Kalaallit Nunaannimi meeqqat inuusuttuaqqallu suli amerlanerit kodiinermik teknologiilu atorlugu pilersitsisinnaassusermik ilinniarsinnaanngussapput. Kinguaariit tulliit silarsuarmut digitaliusumut siunissami inuuffigisassaminnut piareersimalluarnissaat peqataaffigerusupparput.

Silarsuaq digitaliusoq ineriartorfiujuaannarpoq, kinguaariillu tulliit siornatigumut naleqqiullugu aatsaat taama digitaliseeriinermik suliaqartigisussaapput. Taamaattumik suli ukiukitsilluni digitalimik ilisimasaqarnissaq piginnaasaqarfiuvoq pingaaruteqalersimasoq. TELE-POST-ip digitaliseeriineq Kalaallit Nunaannut eqqukkumavaa, taamaattumillu nalunaarutigaa ilitsersuinermut siunnersorti Martin Aaskov Olesen atorfinitsinneqartoq. Ukiuni sisamani Coding Classimi ilinniartitsinermik misilittagalik, Coding Classillu Danmarkimi pilersaarusiarineqarluni ineriartortinneqarneraniilli peqataasimasoq Nunatsinni Meeqqat Atuarfiini Coding Classip ingerlannissaani ilinniartitsisuussaaq.

TELE-POST-ip Kommune Kujalliullu suleqatigiilernerat alloriarneruvoq siulleq Coding Classip Kujataani atuarfinni skemamut ilaalersinnissaanut, 2020-milu iluatsitsilluarnerup kingunerisaanik taamatut ingerlataqarnerup aallarteqqinnissaa TELE-POST-ip qilanaaraa.

-Kommune Kujallermi 7. klassimi atuartut kodiinermik ilinniartinneqarnissaannut qilanaarpunga, qularutiginngilara atuartut soqutiginnillutik malinnaajumaartut. Ullumikkumi meerartagut digitaliusunik atuisorujussuupput. Neriuppunga atuartunit ilinniartitsisunillu soqutigineqarluarluni tigulluarneqarumaartoq pissarsiaqarfiulluarumaartorlu, Kommune Kujallermi Atuarfeqarnermut Meeqqeriveqarnermut Nutaaliornermullu ingerlatsivimmi pisortaagallartoq Ruth Jakobsen oqarpoq.

Nuannaarutigaarput meeqqat atuarfianni atuartuutitta nutaamik misilitaqarnissaannut TELE-POST-ip Kommunitsinnik suleqateqarnera. Suleqatigiinnerup ineriartorteqqinneqarluni siunissami ingerlaqqissinnaanissaa neriuutigaara, Borgmester Kiista P. Isaksen oqarpoq.

 

Paasisaqarnerorusunnermi attavissaq: Tele Greenland A/S-imi Attaveqaqatigiinnermut pisortaq, Julie Rademacher Mobil +299 352626 Mail: julie@telepost.gl