Menu
Your shopping cart is empty.

26/04/2021 - 15:27

Internetteqalersartut amerleriarujussuarnerat 2017-imiit 2021-mut 2135%-imik internetternerulernermik kinguneqarsimavoq. Taamaattumik nalunaarasuartaateqarnermut nutarterinissamullu aningaasaliinissaq pingaaruteqarpoq.

Internetterneq aqqutinik arlalinnik pisariaqartitsivoq

Internettip aqqutaa aqqusinersuarmut assersuunneqarsinnaavoq. Imaatigut kabeli tassaalluni aqqusinersuaq silittorujussuaq biilerpassuit sanileriaat ataatsikkut aqqutigisinnaasaat, sakkortusaaveqarfiillu tassaallutik aqqusineq amitsoq ataaseq, biilit taamaallaat ataasiakkaarlutik aqqutigisinnaasaat. Biilerpassuit aqqusinersuarmit silittumiit aqqusinermut amitsumut pigaangamik tulleriaallutik utaqqilersarput. Taamaapporlu Aasiaanniit avannamut internettip aqqutaa.

Aasianniit Upernavimmut qaqqat qaavini sakkortusaaviit nunaqarfinnut illoqarfinnullu internettikkut sukkanerusumik akikinnerusumillu attaveqartitsipput. TELE-POST-up siornamut Ukiumoortumik nalunaarusiaani takuneqarsinnaavoq nunaqarfinni datanik atuineq 927%-imik qaffassimasoq. 

-Ukiut sisamat ingerlaneranni internettikkut datanik 2000%-it sinnerlugit atuinerulernerujussuup takutippaa sullitagut internettikkut periarfissanik atorluaanerulersimasut, TELE-POST-imi Teknikkeqarnermut pisortaq Jonas Hasselriis oqarpoq.

TELE-POST sakkortusaavinnik nutarterinermut aningaasaliinerulissaaq

TELE-POST sullitami datanik piumasaqarnerulernerannut malinnaalluni Avannaani sakkortusaaveqarfiit pilersuisinnaassusiannik nutarterinissamut aningaasaaliivoq.

-Nalunaarasuartaateqarneq amerlasuunut paasiuminaassinnaavoq, tassa suliarput soorlu timmisartut umiarsuilluunniit angallannerattulli takuneqarsinnaanngimmat, taamaattorli qularutissaanngilaq internettimik atuineq qaffakkiartuinnassasoq sullitagullu piariaqartitsineruleraluttuinnassasut. Taamaattumik Kalaallit Nunaat tamaat Nunarsuarlu qaninnilerulersinniarlugit nalunaarasuartaateqarnermik nutarterinissanut maannakkut siunissamilu aningaasaliinissaq pingaaruteqarluinnarpoq.

Taama TELE-POST-imi Teknikkeqarnermut pisortaq Jonas Hasselriis naggasiivoq oqaluttuarporlu Ingerlatseqatigiiffik ukiumoortumik sanaartornissamut atatillugu Aasiaat Ilulissallu akornanni link-iliissamaartoq. Tamanna Avannaani datat ingerlaarnerisa ullumikkutut ataasiinnaanngitsumik marlunnilli aqqutissaqalernerannik kinguneqassaaq. 

Paasisaqarnerorusunnermi attavigisassaq: paasissutissiisarnermut pisortaq Julie Rademacher, oqar.: 263535, email: julie@telepost.gl