Menu
Your shopping cart is empty.

10/06/2021 - 08:38

Kalaallit Nunaata frimærkii mikisunnguit, nunatta immikkooruteqartumik kulturianut, pinngortitaanut oqaluttuassartaanullu uppernarsaataapput. Taamaattuarsimavoq frimærkit siullerpaat 1938-mi naqinneqarlutillu saqqummiunneqarmatali. Ullumikkut juunip arfineq pingajuanni 2021 frimærkit nutaat, ilaatigut taaneqartunik qulequtallit, POST Greenlandip saqqummiuppai.

Naalagaaffiit Peqatigiit Nunarsuarmi Immanut ulluat 

Inuusuttunnguaq eqqumiitsuliortoq Ivínguak’ Stork Høegh Naalagaaffiit Peqatigiit Nunarsuarmi Immanut ullorititaat malunnartinniarlugu takorluuillaqqissusermik takutitsisumik frimærkiliorpoq. Nunarsuarmi immat nunarsuarmi inuunermut tunngaviusumik pingaaruteqassusaat malunnartinniarlugu, Naalagaaffiit Peqatigiit ukiut tamaasa juunip arfineq pingajuannik malunnartitsisarput. Immap inussutissanik nioqqutissiornermut, peqqissutsimut, piuinnarnissatsinnut, silap pissusaanut imaanilu piusunik piujuartitsiniarluni iliuuseqarnissap pingaaruteqassusianut inuit eqqumaffiginninnerulernissaat Naalagaaffiit Peqatigiit anguniagaraat. Nunani tamalaani iliuuseqarnermut tassunga Kalaallit Nunaat iternga tikillugu peqataavoq. Frimærki offsettitut naqitaavoq saqqummissallunilu helark-itut.

Uumasut uloriarnartorsiortinneqartut 

Uumasut nungutaanissamut ulorianartorsiortitaasut ukiup EUROPA-frimærkiani qulequtarineqarpoq. Pinngortitaleriffik Aarhus Universitetilu uumasut nungutaanissamut ulorianartorsiortut pillugit allattorsimaffimmik aappaluttumik taaneqartartumik suliaqarput.

Taanna Kalaallit Nunaanni uumasut naasullu nungutaanissamut ulorianartorsiortut sumi inissisimanerannut allattuiffiuvoq suliarineqarnissaanillu imitsisuuvoq Namminersorlutik Oqartussat ataanni Aalisarnermut, Piniarnernut Nunalerinermullu Naalakkersuisoqarfik. Nungutaanissamut ulorianartorsiortitaasut allattorsimaffiat kingulleq 2018-ernisaq naapertorlugu, Kalaallit Nunaanni uumasut ikittuinnaat nungutaanissamut ulorianartorsiortitaasutut nalilerneqarput. Nerleq Kalaallit Nunaanneersoq nungutaanissamut ulorianartorsiortitaavoq qasigiarli ulorianartorsiortinneqarluinnartutut nalilerneqarluni. Frimærkit eqqumiitsuliortup tamatigoortup Miki Jacobsenip titartagai frimærkinut pappialartassamut nalinginnaasumut naqitaallutik helark-itut kiisalu frimærkehæftetut pappialamut nammineerluni nipputtartumut naqitatut saqqummissapput.

Kalaallit Nunaata frimærkii pillugit annerusumik atuarit nittartakkatsinni https://www.stamps.gl/-imi.

Erseqqissaatit: PostEurop Nunarsuarmi Allakkerinermik ingerlatsiviit kattuffiata UPU-p europami ilagaa Europami pisortat allakkerinermik kiffartuussinerinut kattuffiusoq. POST Greenlandi allakkeriviit tamakku ilagaat. PostEurop ukiut tamaasa EUROPA frimærkimik saqqummertsitsisarpoq. EUROPA-frimærkit nunarsuarmi tamarmi katersisartunit assorsuaq nuannarisaapput. POST Greenland 1994-imiit EUROPA-nut nangeqattaartunut frimærkinik saqqummiisarpoq ukiut tamaasa qulequtaasoq nutaaq naapertorlugu.

PostEurop pillugu allanik atuarit uani. 

Allanik paasisaqarusukkuit Frimærkinut pisortaq Allan Pertti Frandsen, apf@telepost.gl, tlf. +45 61 39 30 65-imut attavigisinnaavat.

Frimærkit nutaat pillugit quppersagaq qallunaatut.