Menu

150.000 kr. MIBB-imut

26/10/2015 - 14:07

150.000 kr.-it Meeqqat Inuunerissunut

Piumassutsimik ingerlanneqarluni peqatigiiffimmut Meeqqat Inuunerissut / Bedre Børneliv-imut frimærkimut tapiliussatut tunisanit sinneqartoorutit TELE-POST-ip tunissutigai

TELE-POST-imi frimærkinut pisortap Allan Pertti Frandsenip checki 150.000 kr.-inik aningaasartalik Meeqqat Inuunerissunut tunniuppai. Aningaasat frimærkip 2013-imi saqqummiunneqartup nalinganut tapiliussanit isertitaneersuupput. Frimærki, eqqumiitsuliortumit Nikolaj Andersen Olsvigimit suliarineqartoq, ukiuni marlunni nioqqutaavoq.

Frimærkinut pisortaq Allan Pertti Frandsen oqarpoq: - Meeqqat pisinnaatitaaffiinik sulialik MIBB tapersersorsinnaagatsigu nuannerpoq. Peqatigiiffiup sulinermini Naalagaaffiit Peqatigiit Meeqqat Pisinnaatitaaffii pillugit aalajangersagai aallaavigai. Suliniaqatigiiffiit, suliffeqarfiit, pisortat suliffeqarfii innuttaasullu suleqatigiinnerisigut meeqqat navianartorsiortinneqartut pitsaanerusumik inuuneqalernissaannik pilersitseqataasinnaavugut.

- Peqatigiiffik MIBB meeqqat pisinnaatitaaffiinik annertoqisumik suliaqarpoq, 2013-imilu frimærkip nalinganut tapiliussamit sinneqartoorutinik tigusisussaviulluni, Allan Pertti Frandsen naggasiivoq.

Peqatigiiffik Meeqqat Inuunerissut 2007-imi novemberimi illoqarfinni arlalinni akerliussutsimik annertuumik takutitsisoqareersorlu pilersinneqarpoq. Aaqqissuisut kajumissaaripput inuiaqatigiit, minnerunngitsumillu qinikkat, meeqqat ulluinnarni inuunerannik illersuissasut, aammalu meeqqat atugaat annerusumik sammineqartariaqartut. Ukiuni 2012-imiit 2015-imut peqatigiiffiup suliaq annertooq, Villumfondenimit aningaasalersorneqartoq Kuseriarnerup siaruarneratut, ingerlappaa. Suliassaq tulleq MIBB-ip maanna ineriartortinnialerpaa.

MIBB-imut siulittaasoq Katrine H. Nathanielsen oqarpoq: - Frimærkip tunisaaneranit sinneqartoorutinik TELE-POST-ip uatsinnut tunissuteqarnera ikiorsiinerujussuuvoq kajumissaaterujussuullunilu. Suliarujussuatta ’Kuseriarnerup siaruarneratut’–p maannakkut naammassisimalernerani suliassatta tullianik aallartitsinialerpugut tapiissutissanillu qinnuteqaqattaalerluta. Nukippassuit atorneqartussaapput, tassami siulersuisut piumassuseq aallaavigalugu sulimmata. TELE-POST-ip tunissutai arlalinnik periarfissiipput pisinnaanngisaraluatsinnik.

Frimærkip assilinera, frimærkit ilivitsut ataatsit kiisalu tunniussinermit asseq ilanngullugit nassiunneqarput. Allanik paasisaqarumaguit frimærkinut pisortaq Allan Pertti Frandsen attavigiuk uku aqqutigalugit: +299 59 87 55 aamma apf@telepost.gl aamma/imaluunniit MIBB-ip siulittaasua Katrine Hjelholt Nathanielsen uunga: katrine@mibb.gl imaluunniit mobil +299 56 23 79.