Menu

2018-imut frimærkinut pilersaarut

18/01/2018 - 10:00
Ukiut 80-it ingerlaneranni frimærkit Kalaallit Nunaanneersut assigiinngitsorpassuit saqqummiunneqartarput. 2018-imi nutaat 24-t saqqummiutissavagut.
Pisarnertut ukiumut pingasoriarluta saqqummersitsissaagut: Ataaseq januaarimi, ataaseq maajimi aammalu ataaseq oktoberimi. Ukioq frimærkileriffik 2018 ukiup mappianik nuannarineqarluartumik naggaserneqassaaq, mappillu imarai frimærkit pineqartut 24 tamaasa aammalu ilanngunneqarput miniarkit arfinillit.
 
22. januar 2018
• Eqqumiitsuliortup Miki Jakobsenip timersorneq pillugu nangeqattaartuliai naggasissavagut frimærkinik kusanarluinnartunik pingasunik, frimærkillu tamamik immikkut unammissutinut issittumi nuannarineqartunut immikkut ittunut Dene Games-inut imaluunniit Inuit Games-inut. Offset atorlugu naqitaapput, meqqillu ilivitsutut aammalu miniarkitut saqqummiunneqassapput.
• Buuti Pedersen EUROPA-frimærkiliatsinnut marlunnut suliarinnittooqqippoq. PostEurop-ip 2018-imut ataatsimoorussamik qulequtaritippai ikaartarfiit, tamakkuninngalu Kalaallit Nunaanni aamma peqarpugut. EUROPA-frimærkit arkitut ilivitsutut aammalu arkitut mikisutut pappiaqqamut gummitalimmut ammalu hæftimut nammineq nipittartulimmut naqitaallutik saqqummissapput.
• Gukki Nuka eqqumiitsuliortuuvoq sulilluartoq, maannakkullu frimærkiliaminik siullerpaamik saqqummiussisoq. Tamanna pissaaq frimærkitigut marlutsigut nangeqattaartuni ”Kalaallit Nunaanni avatangiiseq”. Gukki Nuka Uummannami peroriartorpoq Københavnimilu najugaqarluni. Gukki Nukap eqqumiitsuliai kalaallit qallunaallu kulturiisa naapinnerannik peqqissaartumik ilusiligaavoq, suliarineqarlunilu skandinaviamiut ilusilersueriaasitoqaat malillugu. Frimærkit marluk taakku naqinneqarput nammineq nipittartumik offset-imik aammalu arkitut ilivitsutut saqqummiunneqassallutik.
• Nangeqattaartut ”Asimi stationeqarfiit” siorna aallartippagut, taakkulu oqaluttuat atortoqarfiit Kalaallit Nunaanni asimi stationeqarfinni assigiinngitsuni oqaluttuarisinnaasaannik ullumikkut oqaluttuuppaatigut. Assilialiortartup Sissi Møllerip nangeqattaartuni taakkunani ukiup frimærkii marluk suliarai. Taakku arkitut ilivitsutut saqqummissapput offset-imillu naqitaassallutik.
 
16. april 2018
• Frimærkip nalinganut tapiliussartalerlugu ukiup frimærkia nioqqutigineqassaaq Foreningen Grønlandske Børn-inut iluaqutissanngorlugu. Assiliartaa Ataqqinartorsuarmit Dronningimit peqatigiiffimmut illersuisuusumit suliarineqarpoq. Ataqqinartorsuaq aatsaavissuaq kalaallit frimærkiliaannut assiliartalersuisuuvoq. Frimærkip nalinganut tapiliussartalik frimærki arkitut ilivitsutut, miniarkitut aammalu tammajuitsussatut mappinngorlugu ataqqinartorsuup inuuiani saqqummersinneqassaaq. Maajip 25-ani pisartakkatut saqqummissaaq.
 
25. maj 2018
• Nunat Avannarliit allakkeriveqarfiisa arfineq pingasuusut nuannarineqarluartoq Nordenserie ukioq allortarlugu saqqummersinneqartartoq nangeqqippaat. 2018-imi nunat avannarliit ataatsimoorussamik frimærkiliassanut qulequtaraat ”Nunat Avannarliit imartaanni aalisakkat”. Uagut ilanngussassagut frimærkit kusanartut marluupput ilisimaneqarluartumit Martin Mörckimit suliarineqartut.
• Nangeqattaartut allat siorna aallartinneqartut tassaapput ”Kalaallit Nunaanni aningaasatoqqat”. Bertil Skov Jørgensenip nangeqattaartunik suliaqarnini ingerlateqqissavaa, tassalu oqaluttuarisaanikkut soqutiginaatilik akiliutigineqartarsimasoq pillugu ukiuni tullerni marlussunni paasissutissittassammatigut. Frimærkit aammaarlutik offset-itut aammalu laseri atorlugu kigartukkatut suliaassapput aammalu arkitut ilivitsutut miniarkitullu saqqummersinneqassallutik.
• Ukioq manna Sepac-frimærkinut qulequtaavoq ”Isikkiviit nalissaqanngitsut”. Sepacimut ilaasortat aqqaneq marluusut, europami allakkerinermik ingerlatsiveeqqat attaveqaataasa tamarmiullutik 2018-imut toqqarpaat frimærkinik nangeqattaartunik nuannarineqarluartunik taakkuninnga saqqummiinissaq. Matuma allannerata nalaani frimærkimut tassunga kina eqqumiitsuliortuussanersoq suli toqqarneqanngilaq. Sepacimut uagut frimærkiliassarput tamatigut suliarineqartarnermisut arkitut ilivitsutut saqqummissaaq naqinneqassallunilu offset-itut.
• Arfininngornermi 26. maj 2018-imi kunngissarput 50-inik ukioqalissaaq. Kunngikkormiunik assiliisartup Steen Brogaardip assilisaa malillugu kusanaqisumik tamanna nalliuttorsiutiginninnerussaaq. Frimærki arkitut ilivitsutut aammalu miniarkitut saqqummiunneqassaaq.
 
22. oktober 2018
• UNESCO-p qanittukkut Kalaallit Nunaata Kujataani nuna nunalerinermut kulturimullu tunngassutilik eriagisassatut kingornussassanut allattorsimaffimmut ilanngutitippaa. Kalaallit Nunaanni aatsaat aappassaanik taamatut ataqqinniarneq anguneqarpoq. Tamanna malunnartissavarput ukiuni qulikkaani Kujataani inuusimasup najugaqarsimasullu ataqqineqarluarluni eqqumiitsuliortup Aka Høeghip kusanaqisumik frimærkiliaanik.
• Nipilersorneq Kalaallit Nunaanni kulturimut oqaluttuassartamullu malunnaateqaqisumik inissisimavoq. Eqqumiitsuliortup Camilla Nielsenip assilialiat katillutik arfiniliusut suliarai, taakkulu takutippaat Kalaallit Nunaanni nipilersornikkut ukiut ingerlatsiviusut arfinillit. Nangeqattaartuni frimærkit kingulliit pingasut ulloq taanna saqqummissapput. Arkitut ilivitsutut aammalu offset-itut naqitatut.
• ”Kalaallit Nunaat Sorsunnersuit aappaata nalaani” nangeqattaartuliatta annertuup 2016-imi aallartittup qulequtaraa. Naja Rosing-Asvid 2020-p tungaanut sorsunnersuaq kalaallit isaannit isigalugu oqaluttuarisassavaa. Nangeqattaartut frimærkitaasa tallimassaannut arfinilissaannullu offset-itut aammalu laseri atorlugu kigartukkanut killippugut, saqqummissappullu arkitut ilivitsutut. Nangeqattaartuliat tamarmik kigartorneqarput Martin Mörckimit.
 
Ukioq manna juullip nipitittagai eqqumiitsuliortumit kinaaneranik ukioq manna kingusinnerusukkut aatsaat saqqummiunneqartussamit suliarineqarput. Soorlu taama pisartugut juullip nipitittagai saqqummersinneqassapput arkitut ilivitsutut pappiaqqamut gummitalimmut aammalu hæftimut nammineq nipittartulimmut naqitaallutik saqqummissapput.