Menu

2G-mut aamma 3G-mut attaveqaat artorsinneqarpoq

05/04/2018 - 11:00

Piffissami matumani sumiiffinni arlalinni TELE-POST-ip 2G-mut aamma 3G-mut attaveqaataa mobildatamik atuinerup annertusinerujussuanik pissuteqartumik artorsinneqarpoq. Annertuunilli pitsanngorsaatissanik neriunaateqartoqarpoq.

Sullitatta mobiliminni datamik atuinerat qaffakkiartupiloorpoq, tassanilu teknologiit nutaanngilisut tamatigut malinnaasinnaaneq ajorput.

- Nunaqarfippassuit aammalu illoqarfiit minnerusut arlallit ukiut qulit sinnerlugit mobilinut attaveqaat ataaseq atugaraa. Datamik annertuumik atuilernerujussuaq 2G-mut aammalu 3G-mut attaveqaatitsinnut nutaanngililersunut artukkeeqaaq, aasamulli illoqarfinnut nunaqarfinnullu tamanut 4G-mut attaveqaammik siaartiterineq aallartissavarput, Teknikkimut IT-mullu qullersaq Jonas Hasselriis oqarpoq.

4G-mut attaveqaat sukkasooq

2G-mut aamma 3G-mut naleqqiulluni Kalaallit Nunaanni 4G-mik kiffartuussissuteqarneq silarsuarmi sukkanerit ilagaat, teknologiilu taanna ukiut tulliuttut marluk ingerlaneranni illoqarfinnut nunaqarfinnullu tamanut siaarneqassaaq.

2017-imi novemberiugaa TELE-POST-ip aammalu Ericssonip peqatigiillutik illoqarfinni nunaqarfinnilu tamani 4G-mut attaveqaat silarsuarmi pitsaanerpaaq 2018-imi 2019-imilu ikkussuutissallugu pilersaarut saqqummiuppaat.

Upernaaq manna suliniutip Mobile First-ip misilerarneqarnera siaartiterneqarneralu illoqarfinni nunaqarfinnilu siullerni aallartinneqassaaq, 2018-inillu ingerlanerani aamma suli siaarsisoqaqqissaaq.

Una toorlugu allanik atuarit: Kalaallit Nunaanni mobilinut attaveqaat nutarterneqassaaq