Menu

Allakkat nassiussallu nuna tamakkerlugu kinguaattooqqasut

08/07/2021 - 12:22

Maannarpiaq timmisartukkut allakkat nassiussallu Kalaallit Nunaat tamakkerlugu apuunniarneqarnerat unammillerfiuvoq. Air Greenlandip timmisartuussineri sapaatit akunnerini kingullerni nuna tamakkerlugu illoqarfinni nunaqarfinnilu arlalinni putsumik silarlummillu eqqorneqartarsimapput, taamaalillunilu allakkat nassiussallu pingaartumik Tunumut, Kujataanut Avannaanullu apuunniarneri ajornakusoorsimalluni. TELE-POST aamma Air Greenland aaqqiissutissamik nassaarniarlutik, taamaalillunilu allakkat poortukkallu apuuffissaminnut allagarsisussanullu apuussinnaaniarlugit ulapputtorujussuupput.

  • Pissutsit ajornakusoorput, sineriak tamakkerlugu ulluni arlalinni sila eqqoruminaatsorujussuusimammat. Tamanna pissutigalugu Air Greenland aamma TELE-POST ataatsimoorlutik aaqqiissutissanik nassaarniarlutik ulappupput, allakkat nassiussallu nuna tamakkerlugu tigusisussanut apuussinnaaniarlugit, Air Greenland-imi Niuernermut Pisortaq Henrik Søe aamma TELE-POST-imi pisortaaneq Kristian Reinert Davidsen oqarput.

Maannarpiaq Air Greenland sapaatit akunnerata naanerani sila ajunngippat nassiussanik allakkanillu assartuilluni immikkut ittumik timmisartuussinissaminik pilersaaruteqarpoq.

Annertunerusumik paasisaqarusunnermi attaveqaqatigiinnermut pisortaq Katja Vahl, kvh@airgreenland.gl, imaluunniit mobil: 58 92 59 aqqutigalugit attaveqarfigineqarsinnaavoq.