Menu

Ataatsimeersuarneq 2018

02/05/2018 - 12:30

 

TELE-POST-ip ataatsimeersuarnera ingerlanneqarpoq ullumikkut maajip aappaani Katuami. Tassani 2017 killiffissiorneqarpoq, tassaammat ukioq siulleq 2020-mut periusissiami ukiuusoq siulleq anguniagaqarfiusorlu annertuunik siunissaq eqqarsaatigalugu.

- Ukioq ataasingajak qaangiuppoq uanga pisortaanerpullu Kristian R. Davidsen maani nikorfagatta, TELE-POST-imut 2020-p tungaanut periusissiami qulequttat pingaarnerit siulersuisuni aalajangersakkagut oqaluttuaralutigik. Taamani oqarpunga, tamatuma kingorna ukkatarissagipput periusissiap naammassineqarnissaa. Nuannaarutigalugu oqaatigisinnaavara, ukiumi qaangiuttumi taamatorpiaq iliorsimagatta aammalu ingerlatseqatigiiffiup toraarneqartussatut naleqqiussimasaasa eqquutsinneqarnissaannut ingerlagatta!, ataatsimeersuarnerup nalaani siulittaasutut nalunaaruteqarnermini Stine Bosse taama oqarpoq, nangillunilu:

- TELE-POST aktieselskabitut aaqqissuussaavoq, pingaarnerpaatullu anguniagaavoq ingerlatseqatigiiffimmik ingerlatsinissaq aningaasaqarnikkut sinneqartoorfiusumik, sullitanik naammagisimaarinnittulimmik aammalu sulisoqarnissaq nuannaartunik. Uannulli pingaaruteqarpoq oqaatigissallugu, Kalaallit Nunaanni innuttaasut ineriartortuarnissaannut pitsaasumik qanoq qaffasitsigisumik tapersiisimanerput aallaavigalugu, iluatsinnerput aamma uuttortaratsigu. Tamanna TELE-POST-ip ilisarnaataaniilluinnarpoq.

Stine Bossep 2018-imi pilersaarutit annertuut aammattaaq oqaluttuarai, tassunga ilaalluni attaveqaatinik annertusaaqqinnissaq. Tannani pineqarpoq angallattakkanut attaveqaat ledningeqanngitsoq muteerneq aammalu Upernavimmut sakkortusaaviup annertusaaviginissaa.

Ukiumi angusat

Ukiumi angusat akileraarusereerlugit 20%-inik qaffapput, 2016-imi 82,9 mio. kr.-inut naleqqiullutik 99,3 mio. kr.-iugamik. TELE-POST 2017-imi iluanaarutinit akiliuteqassaaq 137,3 mio. kr.-inik, Namminerlu aningaasaatai 2017-ip naanerani 1,151 mio. kr.-iupput.

- Pilersaarutit annertuut suliarinerat aallartipparput, ilaatigut attaveqaatinik pitsanngorsaanernik ilalik. 2017-imi imaatigut kabeli avannamut tallivarput, minnerunngitsumillu suliffeqarfik pisariillisaaffigaarput allanngortiteriffigalugulu. Mobiltelefoneqarnerup interneteqarnerullu iluanni sullitatsinnut nioqqutinik nutaanik pitsaanerusunillu tamanna kinguneqarpoq. Angusat ajunngilluinnartut TELE-POST-ip suliassanik annertoorsuarnik ingerlatsisinnaasimaneranit aammalu aningaasaqarnikkut angusassanik ajunngilluinnartunik angusaqarsinnaasimaneranit, ilaatigut ingerlatsinikkut annertunerusunik sipaaruteqarsimanikkut, takuneqarsinnaavoq. 2017 ukiuusimavoq ulapiffiusoq angorusutatsinnik angusaqarfiusimasoq, tamatumunngalu sulisut annertuumik qujassuteqarfigaagut, pisortaaneq Kristian Reinert Davidsen oqarpoq.

Siulersuisut

Siulersuisuni ilaasortat taakkooqqinnissaat piginnittunit toqqarneqarpoq. Ataatsimeersuarnerup kingorna taamaalillutik siulersuisuulerput: Namminersorlutik Oqartussanit toqqarneqarlutik siulersuisuni ilaasortat Stine Bosse (siulittasoq), Ulrik Blidorf, Kim Søgård Kristensen aamma Inaluk Brandt, aammalu sulisut qanittukkut siulersuisuni ilaasortassatut qinigaat pingasut Emil Kleemann, Ole Zeeb Andersen aamma Jørgen Rosbach.

                ​