Menu

Ataatsimeersuarneq – siunissamut aningaasaliinerit oqaluuserineqartut

08/06/2017 - 17:18

TELE-POSTi ullumi sisamanngornermi 8. juuni ataatsimeersuarpoq, siunissami Kalaallit Nunaanni internettip ineriartortinnissaanut pilersaarutit annertuut oqaluuserissani pingaarnersaallutik.

2020-p tungaanut periusissiaq nutaaq decembarimi 2016-imi akuersissutigineqarpoq, internettip atuisunut pitsanngoriaateqartinnissaa siunertaralugu attaveqaateqarnikkut annertuumik aningaasaliinissamik imaqartoq. Tamatumani nalinginnaasumik inuiaqatigiinni teknologip pitsanngoriaateqartinneqarnissaa anguniarneqarluni.

-          Inuiaqatigiit 92 %-iisa Nuummi internettimik neqeroorutit assinginik periarfissaqalernissaat anguniarlugu angisuunik pilersaaruteqarpugut. Attaveqaateqarnikkut atortulersuutit sakkortunerusut Kalaallit Nunaata siunissaanut pitsaasorujussuarmik sunniuteqassapput – aamma inuit nalinginnaasut ulluinnaannut. Nunamut inissisimanermigut angisuujusumut aamma isorartuumut attaveqaateqarnerup atorsinnaasuunissaa pingaarutilerujussuuvoq, siulersuisunut siulittaasoq Stine Bosse oqarpoq.

Ataatsimeersuarnermi tusarnaariat ilaatigut digitalinngortiterinerup inuiaqatigiinnut annertuumik pingaaruteqarnera aamma sunniuteqarnera pillugit Arctic Business Networkimi siulittaasup Poul Hededalip oqalugiarneranik tusarnaassallutik periarfissinneqarput. Naggataatigut attaveqaateqarnitsinnik pitsanngoriaataasussamik TELE-POSTip pilersaarutai annertuut aamma taakku killiffii pillugit pisortaaneq Kristian Reinert Davidseni saqqummiivoq.

 

Ukiumi angusat

TELE-POSTip akileraarutinut akiliuteqartinnani ukiumut angusai kusanartut 122,2 mio. kr.-nik amerlassusillit siulersuisut apriilip qaammataani saqqummiuppaat. Ataatsimeersuarnermi ullumi ingerlanneqartumi akuersissutigineqarpoq 82,0 mio. kr.-t agguagarsiassatut Namminersorlutik Oqartussanut tunniunneqassasut.  

-          Attaveqaateqarnikkut annertusaanissamut aamma pitsanngorsaanissamut pisariaqartinneqartumik aningaasaqarnikkut inissisimaneq tamanna tunngavigalugu annertuumik suliaqarsinnaavugut, naggaterpiaani atuisut internettimik atuineranni suli annerusumik nuannaarutaasussamik, pisortaaneq Kristian Reinert Davidseni oqarpoq.

Siulersuisut

Piginnittut siulersuisunut ilaasortamik ataatsimik taarsiissallutik ataatsimeersuarnermi aalajangerput, taamaalilluni Maliina Abelseni tunuarpoq, Inaluk Brandtilu ilaasortatut nutaatut toqqarneqarluni. Taamaalillutik  ataatsimeersuareernerup kingorna siulersuisunut ilaasortat tassaalerput Stine Bosse (siulittaasoq), siulersuisunut ilaasortat Ulrik Blidorf, Kim Søgård Kristensen, Emil Kleemann, Malene Broberg, Pele Kleemann kiisalu ilaasortaq nutaaq Inaluk Brandt.


Paasissutissanik arlaqarnerusunik pissarsiniarluni attaveqarfissaq: Attaveqaqatigiinnermut pisortaq Arnakkuluk Jo Kleist, 54 78 54, ajk@telepost.gl