Menu

Atuarfimmi kodilerineq iluatsilluartoq

23/10/2020 - 14:53

TELE-POST-ip Kommuneqarfik Sermersuullu suleqatigiilluarnerisigut misiliutitut ingerlataq iluatsilluarpoq. Kalaallit Nunaanni Coding Class siullerpaaq Nuummi Kangillinnguit Atuarfianni 7. klassimi atuartunut iliniartitsissutigineqarpoq sap. ak. 43-mi.

Kodilerineq ikiorsiullugu ajornartorsiutinut piviusunut aaqqiissutaasinnaasunik atuartut ullunik tallimanik sivisussusilimmi atuartinneqarput. Aaqqiissutaasinnaasumik ilusilersuineq ilinniarpaat, aaqqiissutissarlu app-programmi ”Scratch” atorlugu koderlugu. Tamatuma kingorna atuartut aaqqiissutissatut siunnersuusiartik TELE-POST-imut saqqummiuppaat.

TELE-POST-imi Coding Class-ip ingerlanneqarneranut ataqatigiissaarisup Tanja Christensenip ilinniartitsinerup ingerlasimanera oqaluttuaraa:

-Meeqqat nuannisaqaat tulluusimaarlutillu. Assorsuaq isumassarsinarpoq takullugu meeqqat suliassamut qanoq pulaannavitsiginerat. Teknologii nutaaliorusussuseqarlutik iserfigaat, maannakkullu kodiineq ilinniarsimalerpaat kiisalu misigisaqarfigalugu digitalimik paasinninnerulissutigisaminnik.

Ingerlanera pissanganarpoq aammalu suliffeqarfiup, kommunep atuarfiullu suleqatigiinnerat ajunngilaq
TELE-POST, atuarfiit, Kommuneqarfik Sermersooq Coding Class Danmarkilu akimorlugit kodiinermik Kalaallit Nunaanni siullerpaamik misiliutaasumik suliaqarneq pissanganaqaaq. TELE-POST-imi pisortaaneq Kristian Reinert Davidsen Kommuneqarfik Sermersuumilu borgmesteri Charlotte Ludvigsen, Coding Class-ip ingerlanneqarnera malinnaavigaat.

Kristian Reinert Davidsen, TELE-POST-imi pisortaaneq:
-Coding Class-ip Kalaallit Nunaannut anngunnera assut nuannerpoq. Meeqqat kodiinermik suliaminnik takutitsigaangata isaanni qaamaneq takullugu, siunissami TELE-POST-imi piginnaaneqarluartunik sulisoqalernissaq nunallu digitalikkut siunissaa qaamanerusutut isikkoqalerpoq. Kommuneqarfik Sermersooq, Kangillinnguit Atuarfiat aammalu Coding Class Danmark suleqatigiinnermut iluatsilluartumut qujaffigingaarpagut.

Borgmester Charlotte Ludvigsen:
-Ersarilluinnarpoq meeqqat kodiinermik ilinniarnertik suliaminnillu saqqummiinertik nuannareqigaat. TELE-POST-ip Coding Class Danmark-illu pilersaarutip Kalaallit Nunaannut tikiunnissaanut Kommuneqarfik Sermersuumik suleqateqarnissartik toqqarsimammassuk nuannaarutigaarput, suleqatigiinnerlu ingerlaqqissasoq neriuutigaarput, taamaalilluni Coding Class kommunemut tamarmut siammarsinnaaniassammat.

Atuarfimmik aqutsisoq Laila Lyberth:
-Coding Class meeqqanut misigisaavoq pissanganartoq ilinniarfiusorlu. IT ullumikkut atuartitsinermi assut pingaaruteqarpoq, taamaattumik Kalaallit Nunaannut anngussimanera nuannaarutigeqaara, siunissamilu atuartitsinermut aalajangersimasutut ilaalernissaa neriuutigalugu.

TELE-POST-ip Coding Classit Coding Piratesillu nunamut tamarmut siammarnissaat neriuutigaa, taamaalillutik meeqqat inuusuttullu amerlanerit kodiinermik programmilerinermillu ilinniarsinnaaniassammata.

 

Sukumiinerusumik paasisaqarumanermi attavigisassat: TELE-POST-imi Attaveqaqatigiinnermut pisortaq Julie Rademacher +299 263535 imaluunniit Kommuneqarfik Sermersuumi Attaveqaqatigiinnermut pisortaq Lars Damkjær +299 563120-mut.