Menu

Atuartoq Qaqortumeersoq Coding Classimi Danmarkimi kodelerilluni ajugaaniutivinnermi ajugaasoq

22/06/2021 - 16:17

Johannes Blidstrand Qaqortumeersoq Kalaallit Nunaanni Coding Classimi pissartanngorniunnermi 11. juni, Danmarkimi ajugaaniutivinnissaminut ingerlaqqissimavoq. Ullumikkut Johannes internetsikkut Coding Classimi kodelerilluni ajugaaniutivinnermi, Københavnimi Odensemilu ingerlanneqartumi ajugaavoq.

Johannesip ’Ocean Guardian’ kodersimavaa, nunarsuarmi anguniakkat 14.-issaat aallavigalugu sanaaq: Imaani inuuneq. FN-ip piujuartitsinissamut nunarsuarmut anguniagai 17-t tassaapput, 2030-p tungaanut inunnut avatangiisinullu pitsaanerusumik ineriartortitsinissamut anguniagaqarlutik ingerlanneqartut.

Ocean Guardian plastikkinik katersuinermut-, eqqakkanik ikilisaanermut-, immallu uumasuisa illersornissaanut tunngasuuvoq. TELE-POSTimi piujuartitsinissamut siunnersorti Tanja Christiansen oqaluttuarpoq

  • Nuannerluinnarpoq takullugu atuartup Qaqortumeersup kodelerinermi akissarsitinneqarnera, Johannesilu sinnerlugu tulluusimaarlutalu nuannaarpugut. Johannes Coding Classimut soqutiginnilluarluni pimoorussillunilu peqataasimavoq. Coding Class TELE-POSTip Kommune Kujalleq Innovation South Greenlandilu suleqatigalugit pilersissimavaat, nuannaarutigaarpullu Kalaallit Nunaanni inuusuttut akornanni digitalikkut piginnaaneqarneq iluatsilluartumik qaffatsinnissaanut peqataasinnaasimavatta.

Coding Classimi ajugaaniutivinneq 2021

Kalaallit Nunaanni pissartanngorniunnermi ajugaareerluni, Johannes Danmarkimi Coding Classimi ajugaaniutivinnissamut ingerlaqqissimavoq, tassani atuartut 12-t unammissallugit. Ullumikkut dommerit Johannesip spilliliaa Ocean Guardian ajugaasutut toqqarpaat. Pinnataq tassaavoq Coding Classimi ajugaaniutivinnermi 2021-mi suussutsit pingasut akornanniittoq: Gamingimi eqqugassaq, Nutaaliornermi eqqugassaq Kodelerinermilu eqqugassaq.

Johannes oqaluttuarpoq kodelerinermi eqquisimanini assut nuannaarutigalugu tamannalu paasinarluinnarpoq. Ukioq manna Kalaallit Nunaat siullerpaamik Danmarkimi Coding Classimi ajugaaniutivinnermi peqataavoq, taamaattumik Johannesip angusai assut tulluusimaarutigaagut.

Innovation South Greenlandimut qujarusuppugut Johannesip Kalaallit Nunaanni Coding Classimi pissartanngorniunnermi, Danmarkimilu ajugaaniutivinnermi peqataanissaanut periarfissiisimammat.

Ineriartortitsinermi siunnersorti Naja Motzfeldt, Innovation South Greenlandimeersoq suleqatigiinneq pillugu akissuteqarpoq:

  • Johannesip Danmarkimi ajugaaniutivinnermi ajugaasimanera assut nuannaarutigaarput! Innovation South Greenlandimi Johannes sinnerlugu assut tulluusimaarlutalu nuannaarpugut. Nuannaarutigaarput Innovation South Greenland, Johannesip pissartanngorniunnermi peqataanissaanut piareersaanermi ajugaaniunnermilu ikiutaasinnaasimammat. Johannes angutaavoq oqaaseqarpallaanngitsoq, timaatigulli takuneqarsinnaavoq Kalaallit Nunaanni pissartanngorniunnermi, ingammillu Danmarkimi ajugaaniutivinnermi ajugaanini assorsuaq nuannaarutigigaa. Neriuutigaarput Johannesip kodelerinermut soqutiginninnini aallutiinnarumaaraa, aamma neriuppugut meeqqat allat Johannesimut malinnaajumaartut.”

Annertunerusumik paasisaqarusunnermi attavigisassaq: Attaveqaqatigiinnermut pisortaq Julie Rademacher, mobil: 263535, email: julie@telepost.gl