Menu

Canadami fiberikkut ajutoorneq

22/05/2019 - 15:51

Nutartigaq 22.05.19 nal. 18.05 TELE-POSTip Canadami immikkut attavilerneq  iluatsippaa taamaalillunilu attaveqaatit iluarseqqipput. 

Canadami nunaatigut kabelip ajutoornera nunatta annerpaartaani internettimut attaveerutsitsivoq. Atuisut Nuummiit Upernavik ilanngullugu internettimut attaveqanngillat. Kujataa aamma sumiiffiit satellitsimik attavillit eqqugaangillat.

- Piffissami kigullermi attavilersuutinik tunioraasugut oqaloqatigisaqattaarpagut attavilersuutinik imminnut attuumassuteqanngitsunik kissaateqarluta, taamaalilluta ajutoornerit massakkutut ittut siunissami internetteqarniarnermut ajutuussutaassannginnerussammata, taama oqarpoq Teknikkimut IT-mullu pisortaq Jonas Hasselriis.

Attavilersuutit imminnut attuumassuteqanngitsut taaneqartarput redundant-i, taamaattoq pilersaarutigineqarpoq sapaatip akunnerata ingerlanerani ikkunneqarnissaa. TELE-POSTip naatsorsuutigaa taamaaliorneq attaveqarniarnermut pitsanngorsaataassasoq naak Qaqortup avataani imaatigut kabeli suli ajutooqqagaluartoq.

Attaviit ajorteqqajaasut

Internettimut attavik ajorteqqajaavoq imaatigut kabelikkut attavik taamaallaat Canadakkut attaveqarmat. Qaqortumi imaatigut kabelikkut ajutoorneq aggustimi aaqqippat attavik Canadamiit Islandimiillu ingerlaqqilissaaq taamaalillunilu attaveqarnerit allanngujaalleqqissapput.

Akiliiniarnermut terminalit eqqorneqassapput

Ajutoorneq akiliiniarnermut terminalini oorinillu tigusiffinni ajutoortitsivoq. Pisiniarfinni attaveqarnatik akiliisitsisinnaasuni pisisartut korti akiliutaasartoq atorsinnaassavaat.