Menu

Canadami ikuallattoqarnera pissutigalugu attaviit ajoqusersorneqarput

30/10/2017 - 10:01

Ataasinngornermi ullaakkut Kalaallit Nunaanni tamarmi sullissagut TELE-POSTip Canadami suleqataani attaveeruttoqarneranit sunnerneqarput, tamatumalu kinguneraa interneti sukkaannerusoq aammalu SMS-inik nassiussisinnaannginneq.

- Canadami suleqatigisatsinni ikuallattoqarneranik pissuteqartumik TELE-POSTip Canadamut attaviini ajornartorsiortoqarpoq. Tamatuma internetimik aamma SMS-imik sullitatsinnut sullissinerput sunniuteqarfigaa. Pisoq tamanna assorsuaq nalaatsorpoq, tassami Kalaallit Nunaata Kujataani imaatigut kabelimik suliaqarnermi internetimik atuineq tamarmi Canadap tungaanut imaatigut kabelimut nuunneqarnikuummat. Ajornartorsiut sukkanerpaamik aaqqinniarlugu ulapippugut, Teknikkimut IT-mullu pisorta Jonas Hasselriis oqarpoq.  

TELE-POST imaatigut kabelinik marlunnik attaveqarpoq, ataaseq Canadamukartoq ataaserlu Islandimukartoq. Taamatut inissitaapput kabelip aappaani ajoquteqartoqalersinnaaneq pissutigalugu, taamaattumillu internetimik atuineq kabelip aappaatigut nuunneqarsinnaaniassammat. Taamaattumik nalinginnaasussaagaluarpoq sullitatta ajoqummik matumatut ittumik malugisaqannginnissaa, imaatigulli kabelip pilersaarutaareersumik nuunneqarnissaata pissutigalugu sapaatip akunnera kingullerli Islandimut attavik atorsinnaasimanngilaq.