Menu

Canadami kabeli fiberiusoq kittorarsimavoq

14/05/2019 - 17:45

TELE-POST-ip Canadami pilersuisuata nalunaarutigeqqammerpaa, Canadami pilersuisorisatsinni kabelimi fiberiusumi kittorartoqarsimasoq. Kittorarneq tamanna erngerluni suliarisariaqarpoq, tassami Nuup Upernaviullu akornanni sullitatta internetimut attaveerussinnaanerat tamarmi pisinnaalluarmat.

Sullitatta annikinnerpaamik sunnerneqarnissaat pillugu, pilersuisorisatta kabeli fiberiusoq unnuaru, pingasunngornerup unnuaani, aaqqissuutissamaarpaa Kalaallit Nunaanni nalunaaqutaq malillugu piffissap nal. 03.00-p nal. 05.30-llu iluani. Aaqqissuunneqarnerata nalaani internettimut attaveqassanngilaq.

Piffissaq pilersaarutaasoq sioqqullugu kittorartoortoqareersimas-sappat, taava internetimut attaveeruttoqassaaq, aaqqissuunneralu ingerlaannaq aallartinneqassaaq.

Kalaallit Nunaata Kujataani innuttaasut TELE-POST-ip sullitai aammalu sullitai qaammataasakkoorlugu attaveqaatillit eqqorneqassanngillat.

Qaqortup eqqaani imaatigut kabeli aaqqissuunneqareerpat interneti allanngujaallissaaq

Internetimut attavik ajorteqqajaavoq, Nuummiit Upernavimmut isorartussuseq maannakkut taamaallaat imaatigut kabelikkut Canadamukartukkut internetimut attaveqarmat. Qaqortumi imaatigut kabelip kittorarnera aaqqissuunneqareerpat, taava Island aamma Canada aqqusaarlugit internetimut attaveqartoqaqqilissaaq, taamaalillutillu imaatigut kabelikkut attaveqarnerit allanngujaalleqqissapput.

Umiarsuaq imaatigut kabelimik aaqqissuussiartortoq maannakkut kabelip kittorarfianiippoq, suliallu aallartinnissaanut sikup pernissaa utaqqiinnalugu.