Menu

Coding Piratessit nutaat

07/04/2021 - 12:45

Suleqatigiilluarnerit aqqutigalugit TELE-POST-ip 2020-mi Coding Classeqartitsineranut malitsigitillugu Coding Piratessinik aamma ingerlatsisoqarpoq. Coding Piratessitut taallugu aaqqissuussani meeqqat sunngiffimminni teknologii kodiinerlu iluaqutigalugit pilersitsisinnaanermik
ilinniartinneqarput. Aaqqissuussinerit meeqqanik atuartitsinermut attuumassuteqanngimmata piumassutsiminnik ilinniartitsiserusuttut suleqatigalugit ingerlanneqarput. Steffen Jensen Attaveqaateqarnermut immikkoortortameersoq Coding Piratessit aallartimmatali nammineq piumassutsiminik ilinniartitseqataasalersimasoq ima oqarpoq:

  • Coding Piratessinut peqataanera nuannaraara aaqqissuussineq aqqutigalugu meeqqanut qarasaasiakkut qanoq programmeeriisoqarsinnaanera pillugu ilinniartitsigatta.

TELE-POSTip namminneq piumassutsiminnik iliniartitseqataanissamut soqutiginnilluartut suleqatigalugit meeqqanut pikkorissunut Coding Piratesseqartitsinerani meeqqat qarasaasiakkut programmi ’CoSpaces’ atorlugu “ingerlaarfissamik akornusersukkamik” pilersitsiniarnerminni kodiisinneqarput, naammassilluarpaallumi. Meeqqat Coding Piratisseqataasimasut naliliinerminni ilaatigut makkua oqaatigaat “atassuteqaatinik nutaanik pilersitsineq”, “ataqatigiilluarneq” aammalu ”nutaanut peqataaneq ilikkagassanillu allaanerusunik ilikkagaqarneq”.

  • Programmit atuuffiisa paasilluarnissaat pingaaruteqartorujussuusoraara, teknikkimik atuineq ullumikkut inuppassuit inuunerannut pingaaruteqartorujussuanngorsimammat. Pinnguaatit, programmit robotsillu piviusumik tunngaveqarnerannik paasinninneq angakkuakkatullusooq ittunik
    pilersitsisarpoq, amerlasuunut iluaqutaasumik nuannaarutaasumillu, kingusinnerusukkullu nammineerluni iluaqutissanik pilersitsiortornermik nassataqarsinnaalluni, Steffen nammineq piumassutsiminik ilinniartitseqataasoq oqarpoq.

Tanja Christensen TELE-POSTimi Piujuartitsinermut siunnersorti Nunatsinni Coding Piratessinik ingerlatsisalernissamut suleqataasoq oqarpoq:

  • Meeqqanut inuusuttunullu aaqqiissutinik digitaliusunik kodiinermillu atuisinnaalersitseqataanerput nuannaarutigaarput, tamannalu namminneq piumassutsiminnik ikiuuttoqarsimanngitsuuppat piviusunngorsimanavianngikkaluarpoq. Sulilluaqaat meeqqanullu kodiititseqataasimanertik minnerunngitsumillu namminneq aamma pissarsiaqarluarsimanertik pikkugeqaat.

Piumassutsinnik ikiuuteqataasalerit

Kinguaarinnut tullernut sunniuteqaqataasukkuit nammineq piumassutsinnik ikiuunnissamut periarfissaqarputit, allatsissinnaavutillu uunga emailerlutit:  tanja@telepost.gl  peqataarusukkuit ilinniartitseqataasarnissannut immersorluarneqarumaarputit.