Menu

COVID-19 allakkanut poortukkanullu eqquivoq

03/07/2020 - 13:56

Allakkat poortukkallu, Danmarkimiit Kalaallillu Nunaata iluani timmisartukkut nassiussat ajoraluartumik kinguaattuussapput, timmisartuussinerit ikinneruneri silarlullu peqqutaallutik. Air Greenlandip nalunaarutigaa poortukkat sinneri 900 kg-t ullumikkut – kingusinnerpaamillu aqagu arfininngornermi 4. juli 2020 – Kangerlussuarmiit Ilulissanut avannaanullu ingerlaqqissasut.

Allakkerinermut pisortaq, Peter Svendsen ima nassuiaavoq:

- Juunip qeqqata missaanili timmisartukkut assartuineq kinguaattooqqalerpoq, COVID-19 kiisalu Københavnip Kangerlussuullu akornanni timmisartuussinerit ikinneruneri peqqutaallutik. Kalaallit Nunaanni namminermi timmisartuussineq silamit aamma akornusersorneqaqattaarpoq, pingaartumik avannaani. Sullitatta kinguaattoornermut pakatsisimaarnerat paasisinnaalluarparput taamaatumillu sapinngisarput tamaat pitsaanerpaamik sullissiniarsaraluta, ajornakusooraluartoq allakkat poortukkallu sukkanerpaamik apuunnissaat anguniarlugu. Air Greenlandip timmisartuussinissamut silagissioqqilernissaa neriuutigaara – taamaalilluni allakkat poortukkallu utaqqisat Ilulissanut, Upernavimmut Qaanaamullu apuutiaarneqarniassammata. Timmisartuussisoqaqqilerpat assartuussineq aaqqikkumaarpoq.