Menu

Danmarkimi frimærkinik saqqummersitsinersuaq iluatsitsiffiulluarpoq

08/11/2016 - 14:01

Danmark kalaallit frimærkiliaannik katersisartunut niuerfittut pingaarnerpaavoq. Sapaatip akunnerani kingullermi frimærkinik saqqummersitsinersuarni marlunni TELE-POST peqataavoq, kalaallillu frimærkiliaat nuannarineqaqaat.  

TELE-POST ukioq manna Danmarkip frimærkinik Frederiksbergimi saqqummersitsinersuani ’Frimærkimik, Allakkamik Postkortimillu saqqummersitsinersuarmi’ aammaarluni peqataavoq. Taamatuttaaq sapaatip akunnerata naanerani, novembarip tallimaani arfernganilu, TELE-POST Danmarkimi frimærkinik saqqummersitsinerit annersaanni, ’TAK16’-imi Birkerødimi ingerlanneqartumi peqataavoq.

TELE-POST-imi nioqqutissiornermut aqutsisoq Hjørdis Viberg aamma ineriartortitsinermut aqutsisoq Pertti Frandsen saqqummersitsiviusuni tamani peqataapput. 

- Frimærkiliagut nutaanerpaat assorsuaq soqutigineqarput. Katersisartut saqqummersitsivitta saani tunuleriiaarlutik aallartinnitsinniit naammassinissatta tungaanut pisiniarlutillu oqaloqatigaatigut. Mads Pihlip assilisaanik kusanaqisunik assitallit frankeringsmærkit nutaat qallunaat katersisartut akornanni assut nuannarineqarput, Hjørdis oqaluttuarpoq.

Pertti Frandsen nangippoq:

- Ukiup mappea 2016 nutaarluinnaq kiisalu atuagaq aamma nutaarluinnaq ”Kalaallit Nunaanni inuinnarnik silaannakkut angallassinerup oqaluttuassartaa 1960 – 2015” katersisartut pisiariumaqaat. Piumaneqarnerpaajuvorli Kunngissakkut ilaqutariit tamarmiullutik kusanaqisunik kalaallisoortut frimærkiliarineqarnerat.  Frimærki taanna avammut nittarsaassinitsinni aatsaat taama iluatsitsigisumik kinguneqarpoq, ineriartortitsinermut aqutsisoq naqissusiivoq. Hjørdis Vibergip ima ilavaa:

 - Nangeqattaartuliarput nutaarluinnaq ”Kalaallit Nunaat Sorsunnersuup Aappaata nalaani” Danmarkimi katersisartut akornanni sunaaffa taama nuannarineqartigisoq paasivarput. 2020-p tungaanut frimærkinik nangeqattaartuliap taassuma sorsunnersuaq kalaallip isaanit isigalugu takutittarumaarpaa. 

Saqqummersitsinersuit pillugit allanik atuarit www.3fff.dk–mi aamma www.tak16.dk-mi. Allanik paasisaqarumaguit nioqqutissiornermut pisortaq Hjørdis Viberg, mobil +299 584264 aamma/imaluunniit ineriartortitsinermut pisortaq Pertti Frandsen, mobil +299 6139 3065 imaluunniit mail apf@telepost.gl-imut attavigikkit.

TELE-POST-ip frimærkiliai pillugit atuarit uani www.stamps.gl-imi aamma www.facebook.com/stamps.gl-imi.