Menu

DHL TELE-POST Stafettimut inissat nungupput

03/05/2017 - 14:30

Nuummi DHL TELE-POST Stafetti ukioq manna aamma rekortiliiffiuvoq. Peqataaniarluni nalunaarnissamut killiliussaq qaammatip ataatsip missaanik sioqqullugu Kalaallit Nunaanni stafettit annersaannut inissat tamarmik nungupput. Tamanna ima isumaqarpoq maannakkorpiaq arpaqataaniarlutik nalunaartut holdinut 220-nut agguataarsimasut 1.100-t sinneqarmata.   

- Holdit 220-t ukioq kingulleq peqataapput. Inussivimmi amerlanerpaamik isersimasinnaasut taamanikkut angungajappavut. Taamaattumik ukioq manna aamma holdit peqataasinnaasut amerlassusissaat killilerpavut, stafetternissamut ataqatigiissaarisoq Charlotte Mølgaard Hansen nassuiaavoq. 

Killiliussaq holdinik arlariinnik qaangerneqarpoq. Aaqqissuussamut pitsaanngitsumik kinguneqanngitsumik holdit amerlanerulaartut peqataasinnaanersut TELE-POSTimit misissorneqaleruttorpoq.  

Peqataaniarluni nalunaarnissaq angumerineqarsimanngippat utaqqisunut allattorsimaffimmik pilersitsisoqarpoq, misilittakkat malillugit tamatigut holdit ilaat peqataanissaminnit tunuaannartarmata. Utaqqisunut allatsinniarluni mailimik nassitsisoqassaaq, uunga: stafet@telepost.gl

Stafetti juunip arfineq pingajuat, nal. 17.00, Inussivimmi aallartinneqassaaq.  

Paasissutissanik arlaqarnerusunik pissarsiniarluni attaveqarfissat: ataqatigiissaarisoq Charlotte Mølgaard Hansen 55 52 66, chmh@telepost.gl, imaluunniit Attaveqaqatigiinnermut pisortaq Arnakkuluk Jo Kleist, 54 78 54, ajk@telepost.gl