Menu

DR nalunaaqutaa allanngortinnagu

25/07/2017 - 09:15

DRip KNRillu TV-kkut kiisalu KNR-radiop attavii suli tassa akornuteqartuarsinnarput. Ajoqutaasunik aaqqiiniarnermut atatillugu DRip kanaaliisa nalunaaqutaat nunatsinnut nalimmassarnagit ulluni marlunni aallakaatinneqartassapput.

- TELE-POST-imi ajornartorsiut taanna aaqqinniarlugu ilungersorpugut qularnaarusupparpullu kukkunerit eqqortut aaqqiivigisarnissaat. Tamatuma kinguneranik maanna DR’ip kanaaliisa nunatsinni nalunaaquttamut nalimmassarneqartarnerat unitsikkallartariaqarparput. Neriuppugut taamaaliornikkut signalit attaveeruttaqattaarnerat sumik peqquteqarnersoq takusinnaalissallutigu, attaveqatigiinnermut pisortaq Arnakkuluk Jo Kleist oqarpoq.

Nalinginnaasumik DRip kanaalii nal. akunnerinik sisamanik kinguartillugit takutinneqartaraluarput, tassa piffissap nikinganera pissutigalugu. Ajoqutaasumilli aaqqiinniarneq pissutigalugu DR’ip kanaalii ulluni marlussunni Danmarkimi takutinneqarnermissulli toqqaannartumik aallakaatinneqartassapput. Tamanna aallartissaaq marlunngorneq juulip 25-at nal. 10.00-imiit atuutissallunilu sisamanngorneq juulip 27-at nal. 10.00  tungaanut.

 

Annertunerusumik paasisaqarusuttunut saaffissaq: attaveqatigiinnermut pisortaq Arnakkuluk Jo Kleist, ajk@telepost.gl, 547854.