Menu

Dronningip 80-iliinerani TELE-POST frimærkimik saqqummersitsivoq

15/04/2020 - 16:08
TELE-POST udgiver 80-års fødselsdags frimærke med H.M. Dronningens portræt

Dronning Margrethe II-p 80-iliilluni 16. april 2020 inuuissiornera frimærkimik kusanartumik saqqummersitsinermigut TELE-POST-ip  malunnartippaa.

Ataqqinartorsuup kalaallisoortup qalipallugu assilinera nunatsinni eqqumiitsuliortumit nuimanerpaamit, nunarsuatsinnilu eqqumiitsuliortutut ilisimaneqarluartumit, Aka Høeghimit, qalipanneqarsimavoq. Eqqumiitsuliortorsuup Ataqqinartorsuarmik ukiorpassuit ingerlanerini naapitsisarnini qalipakkaminut isumassarsiorfigisimavaa. Qaqqat qaavi, assimi Dronningip niaquata tunuata nalaaniittut, Dronningip niaqorutaatut ilusilerneqarsimapputtaaq, Aka Høeghip eqqarsaatigilluarlugit ivertissimasai.

Sullitanut Allakkerinermullu pisortaq Per Svendsen, ulloq pillugu ima oqarpoq:

Ukiut ingerlanerini ileqquulersimavoq kusanartoq, kunngikkormiuni angisuunik ullorsiortoqartillugu kalaallit frimærkiannik saqqummersitsinikkut malunnartitsisoqartarluni. Ataqqinartorsuullu Dronningip 80-inik ukioqalerluni inuuissiornera ullorsiorfiuvoq angisooq”

Frimærki ulloq 16. april aallarnerfigalugu TELE-POST-ip Nunatsinni allaffeqarfiini tamani pisiarineqarsinnaalissaaq. Nittartakkatsinni www.stamps.gl -imi frimærkit Nunatsinneersut paasisaqarfiginerusinnaavatit, tassuunalu frimærkinik online-kkut pisiniarsinnaallutit.

 

Sukumiinerusunik paasisaqarusukkuit frimærkinut pisortaq Allan Pertti Frandsen attavigisinnaavat: apf@telepost.gl, tlf. +45 61 39 30 65