Menu

Frimærket nutaat: Filminik plakatitoqqat, anersaalersaarutit Kalaallillu Nunaanni Juulli

06/11/2020 - 11:09

Kalaallit Nunaanni filmiliat ukiuni qulikkaani amerlasuuni, nunarsuarmi tamani isiginnaartunit nuannarineqarluarsimapput. Taamaattumik TELE-POST aalajangerpoq frimærket tulleriiaat nutaat filmilianut tunngasuussasut. Filmilianut aalajangersimasunut marlunnut plakatit ilaarlugit frimærkeliorsimavugut. Siulleq tassaavoq ’Paalup Nuliarsarnera’, 1934-mi Friedrich Dalsheim ilitsersuisoralugu filmiliarineqarsimasoq sikuiuitsumullu ilisimasassarsiortartumit ilisimaneqarluartumit Knud Rasmussenimit manuskriptiliarineqarsimasoq. Aappaa tassaavoq ’Qivittoq’ 1956-mi sqqqummertoq, Erik Ballingimit ilitsersorneqarsimasoq Leck Fischerimillu allanneqarsimasoq.

Ulloq manna tikillugu Kalaallit Nunaanni kristumiuussuseq anersaanillu upperisaqarneq sanileriillutik piusimapput. Tamanna piorsarsimassutsimut pingaaruteqarpoq Inuillu upperisatoqaanniit aallaaveqarluni. Ilaatigut oqaluttuatoqqani amerlasuuni tamanna takuneqarsinnaavoq. 1950-kunnilli aamma tamanna frimærkini malunnartinneqareersimavoq Maannakkut nutaaliorluta ’Kalaallit Nunaanni anersaat pillugit oqaluttuat’ isiginiassavagut. Frimærkit marluk kusanarluinnartut,  Maria Bach Kreutzmannimit Christian Fleischer Reximillu titartarneqarsimasut aallartissutigissavagut.

Ukiup frimærkii marluk TELE-POSTimeersut tassaapput titartakkat ilunngunartut,  Juaaka Lyberthip atuakkiaani assiliartalimmeersut, atilimmi ”Orpilissat nunarsuarmi kusanarnersaat”. Titartakkat eqqumiitsuliortumit inuusuttumit Nuummeersumit Maja-Lisa Kehletimit sananeqarsimapput. Titartagai kusanarluinnarput uummaarillutik eqqumiitsuliortorsuanngortussamiillu sananeqarsimallutillusooq.

Pisarneq malillugu ukiumut frimærkit mappet tammajuitsussanik imalinnut inissinneqassapput. Ukioq manna frimærkinik 24-nik miniarkinillu sisamanik ukiup ingerlanerani saqqummersimasunik immerneqassaaq.

Kalaallit Nunaanni frimærkit pillugit paasisaqarnerorusukkuit nittartagaq www.stamps.gl alakkaruk.

 

Paasissutissanik amigaateqaruit frimærkinut pisortaq Allan Pertti Frandsen attavigiuk: apf@telepost.gl, tlf. +45 61 39 30 65.