Menu

Frimærki tulluusimaarutigineqarpoq

19/10/2017 - 15:06

Frimærki nutaaq nuannaarutaallunilu tigusisunit Kofoeds Skolemeersunit ilinniartuutiminnut suli annerusumik iliuuseqarnissaminnut tapiissutisisunit tulluusimaarutigineqarpoq.

Pingasunngornermi oktobarip 18-iani frimærki nutaaq nalinganut ilassutitalik, Nuummi Kofoeds Skolemi kaffilliutigineqarluni, kaagilliutigineqarluni oqalugiarfiullunilu aammalu ilinniartut nipilersorlutik tusarnaartitsiffigisaanni saqqummiunneqarpoq.

Nuummi Kofoeds Skolep ulluinnarni aqutsisua Gudmundur (Gujo) Thorsteinsson killitsisimaqaluni oqalugiarnermini suleqatigiinnermut imatut qujassuteqarpoq:

- Frimærkimik matuminnga tunineqarneq aningaasanik taperserneqarfiuinnanngilaq, aammali uagut nammineq frimærkitsinneq peqarfiulerpoq, tamannalu atuarfiup sulineranik aammattaaq angisuumik nersorneqarfiuvoq, tamannalu assut tulluusimaarutigaarput.

Robert Olsen, Danmarkimi Kofoeds Skolet pisortaanerat, aaqqissuussinermut peqataavoq, imatullu oqaluttuarpoq:

- Frimærki Kofoeds Skolep oqaluttuarisaanerata ilaanik oqaluttuarpoq. Ukiualuit matuma siorna toqqortat akornanni frimærki 1950ikkunni Kofoeds Skolemit suliarineqarsimasoq nanivarput, taamanikkut aamma Kofoeds Skolemut iluaqutaasussatut tuniniarneqarsimasoq. Frimærki taanna puiorneqarsimavoq, frimærkili nutaaq una atuarfiup oqaluttuarisaaneranut aamma ilannguppoq.

Frimærki nunatsinni nunanilu allani soqutiginnittunit pisiarineqarsinnaassaaq, aningaasallu tamatuma kingorna Nuummi Kofoeds Skolemut tunniunneqassapput. Siunertamut kusanartumut aningaasat qanoq amerlatigisut katersorneqarsimanerat piffissap takutikkumaarpaa.