Menu

Frimærkimik Nunatsinneersumik nutaamik saqqummersitsineq

19/02/2021 - 13:27

Ataasinngorpat ulloq 22. februaari 2021 ukiup frimærkia, frimærkip nalinganut tapiliussaq, POST Greenlandip saqqummiutissavaa, tamannalu internetikkut toqqaannartumik malinnaavigineqarsinnaajumaarpoq.

2021-mi ukiup frimærkiata Nunatsinneersup nalinganut tapiliussap sinneqartoorutaanik, Danmarkimi Kalaallit Illui sisamaasut tigusisussatut POST Greenlandip toqqarpai. Tamanna pivoq illut ukiorpassuarni kalaallinik Danmarkimiittunik sullissinerannik Kalaallit Nunaannillu ilisimasaqarnerulernissamik siaruarterisimanerannik nersuiniutitut. 

Nunatsinnut isaariaq kusanarluinnartoq

Frimærki kusanarluinnartoq Nunatsinnut kusanartumut isaarissatut isikkuligaq assilialiortartumit kalaallimik Letlandimiumillu angajoqqaalimmit Bolatta Silis-Høeghimit suliarineqarpoq, taassumalu tulluusimaarutigaa ukioq manna tapiliussatut frimærkimik suliarinnissinnaasimanini:

-Kalaallit Illui uannut tassaapput Kalaallit Nunaannut isaarissat. Suliassaq una aqqutigalugu paasivara Kalaallit Illui inooqataanikkut, kulturikkut, ilinniagaqarnikkut Kalaallit Nunaallu pillugu ilisimasaqarnerulernissamik suliaqarnermut tamarmut qanoq initutiginerat ataatsimuulersitsinerallu – Isumassuinikkut angeqisumillu maniguunnikkut. Uannut Københavnimi najugalimmut angerlalaarnertut misiginartarpoq ulluinnarni inuuninnut nukittorsaataasumik, tamannalu qujassutigaara. 

POST Greenlandimi frimærkinut pisortaq Allan Pertti Frandsen saqqummiinermut atatillugu ima oqarpoq: 

-Danmarkimi kalaallit illui sisamaasut Kalaallit Nunaannik kiisalu kalaallinik Danmarkimi najugalinnik ilisimasaqarnerulernissamik siammarterinerminni angeqisumik sulipput. Taamaattumik Kalaallit Illui taakku sisamat 2021-mi tapiliussatut frimærkip POST Greenlandimit saqqummiunneqartup nalingata katinneranik ataatsimoorlutik tigusisussatut toqqarneqarnerat pissusissamisoorpoq. Inuppassuit tapersersuinerminnik takutitsinertut frimærkimik pisiortuunnissaat POST Greenlandip neriuutigaa.

Saqqummiineq internetikkut toqqaannartumik malinnaavigiuk

Odensemi Kalaallit Illuat toqqaannartumik saqqummersitsinermut qaaqqusisuuvoq, maluunnartitsinerlu Odensemi SR-Filmip immiussisarfianit toqqaannartumik aallakaatinneqassaaq. Tassani 

eqqumiitsuliortoq Bolatta Silis-Høegh aammalu ukioq manna frimærki tapiliussaq ilisaritinneqassapput, Kalaallit Illuini pisortat tamarmik oqalugiassapput erinarsortartorlu nuannariisaasoq Nive Nielsen erinarsussaaq.

Saqqummiineq malinnaaviginiarlugu una iserfigissavat:  https://www.sro.dk/frimaerke2021

Ulloq 22. februar nal. 11 – 12 (Nunatta nal. malillugu) saqqummiinermi pisussat

TELE-POST-ip tapiliussatut 2021-mi frimærkiliaanik Bolatta Silis-Høeghimit titartarneqartumik internetikkut saqqummiineq.

11.00: Tikilluaqqusineq v/Nauja Bianco, Odensemi Kalaallit Illuanni pisortaq

11.05: TELE-POST sinnerlugu naatsumik aallarniineq aammalu frimærkimik pisortatigoortumik saqqummiineq Bolatta Silis-Høeghillu eqqumiitsuliortutut ilisaritinnera, v/Pertti Frandsen 

11.20: Nive Nielsenip erinarsorluni akunniliinera 

11.25: Odensemi Kalaallit Illuanniit qujassuteqarneq v/Nauja Bianco

11.30: København Kalaallit Illuanniit qujassuteqarneq v/Leise Johnsen 

11.35: Aarhusimi Kalaallit Illuanniit qujassuteqarneq v/Tanja Nielsen 

11.40:  Aalborgimi Kalaallit Illuanniit qujassuteqarneq v/Bo Albrechtsen  

11.45: Oqaaseqarneq v/Bolatta Silis-Høegh 

11.50: Naggataarutitut Nive Nielsenip erinarsornera 

11. 58: Inuulluaqqusineq v/Nauja Bianco

 

Allanik paasisaqarumagaanni attavissaq: POST Greenlandimi Frimærkinut pisortaq Allan Pertti Frandsen, email: APF@telepost.gl, mobil: +45 61393065