Menu

Frimærkit Kalaallit Nunaanneersut piumaneqarluartut

31/10/2017 - 15:05

TELE-POST oktobarip 27-aniit 29-ata tungaanut nunat avannarliit frimærkinik ukioq manna saqqummiinerannut peqataavoq.

Nordiap ukioq manna saqqummersitsinera Vejlemi ingerlanneqarpoq. Nordia nunat avannarliit angisuut tallimat paarlakaallutik ingerlattarpaat. Ukioq manna Danmark saqqummersitsiffiusussaavoq, Vejle Frimærkeklub-ilu aammalu Dansk Filatelist Forbund annertoorsuarmik kusanaqisumillu piareersaasimapput.

TELE-POST nammineq nerriveqarluni soqutigineqaqalunilu peqataavoq. Tunuleriiaarlutik utaqqisut amerlanerpaapput ullormi ammarfimmi, tassalu tallimanngornermi oktobarip 27-at. Tamatumunnga Det Franske Antarktiske Territorium-imik, naalisarlugu TAAF-imik, saqqummeeqateqarneq pissutaavoq. Allakkeriveqarfiit taakku marluk taamaalillutik frimærkit assiliartaat assigiit namminneq frimærkiminni saqqummiuppaat. Allakkerivinnit marluusunit taakkunanngaanneersut frimærkit nutaat katersisartorpassuit pissarsiaraat, amerlaqisullu eqqumiitsuliortuata atsiorneranik pissarsipput, tassaavorlu norskeq assiliartassanik titartaasarlunilu kigartuisartoq tusaamasaasoq, Martin Mörck.

Ineriartortitsinermut aqutsisoq Allan Pertti Frandsen oqaluttuarpoq:

- Martin Mörck Kalaallit Nunaannut ikinngutaalluartuuvoq, ilisimasaqarfigilluartuuaalu. 100-t sinnerlugit frimærkiliuunnikuuaatigut, kiisalu taakku saniatigut nunarsuarmi tamarmi allakkeriveqarfinnut 500-t sinnerlugit frimærkiliuussisimavoq. Taamaakkami soqutigineqaqaaq. Ataatsimoorullugu saqqummiussinermi tunisat naatsorsuutigisatsinnik qaangeerujussuarput, taamaattumik nukingiinnaq Danmarkimi toqqorsivitsinnit piniapallattariaqarsimavugut. Taamaalilluta katersisartunut tamanut frimærkinik nutaanik naammatsitseratannguarpugut.

www.nordia2017.dk-mi allanik atuarit. TELE-POSTip frimærkiliai pillugit www.stamps.gl-imi aamma www.facebook.com/stamps.gl-imi annertunerusumik atuarit.

Allanik paasisaqarumaguit Ineriartortitsinermut aqutsisumut Allan Pertti Frandsenimut qinnuigaatsigit attaveqaqqullutit uunga: mobil +45 6139 3065 imalt. apf@telepost.gl-imut aamma/imaluunniit attaveqaqatigiinnermut pisortamut Arnakkuluk Jo Kleistimut, mobil +299 547854 imalt. ajk@telepost.gl-imut.