Menu

Frimærkit nutaat assigiinngiiaartut saqqummiunneqarput

18/10/2016 - 16:08

Frimærkit assigiinngeqisunik qulequtaqarput Kalaallillu Nunaanni oqaluttuarisaanermut ullumikkumullu kiisalu kulturimut tunngasunik qulequtaqartiterlutik.

Saqqummiunneqarput frimærkit arfineq-pingasut, frimærkehæfti ataaseq, miniarki ataaseq, småarkit marluk, mappet tammajuitsussanik imallit marluk ukiullu mappia ataaseq kiisalu ullormi siullermi allakkat puussaat. 

Ukioq manna saqqummiineq kingulleq Naja Abelsenip frimærkiliaanik marlunnik, Tunumi ilisimatusarnermut stationeqarfiusimasumik Zackenbergimik kusanaqisumik assiliartaqartunik, aallarniuteqarpoq. Nangeqattaartussaq nutaaq ”Kalaallit Nunaat Sorsunnersuit Aappaata nalaani” ullumikkut saqqummiunneqarpoq. Nangeqattaartunik suliaqartussaavoq Naja Rosing-Asvid, kalaallillu isaannit isigalugu sorsunnersuaq 2020-p tungaanut assiliartaliortassavaa. 

Kunngissakkut novembarip 14-iani 2016 ukiut 13-issaat avillugu katinnerminninngaanniit nalliuttorsiussapput. Tamanna frimærkimik kusanaqisumik nalliuttorsiutigissavarput, tassanilu takuneqasinnaassapput Kunngissakkut ilaqutariit tamarmiullutik kalaallisoortut. Asseq assilineqarpoq kunngikkormiunik assiliisartumit Steen Brogaardimit. 

Pisarneq malillugu frimærkit juullerpaluttut marluk saqqummiunneqassapput, tassalu frimærkitut nalinginnaasutut pappiaqqamut gummimik qallikkamut naqitatut aammalu hæftitut nammineq nipputsittakkatut. Tamatumuuna eqqumiitsuliortoq inuusuttoq Sissi Møller juullerpaluttunik titartaasuuvoq. 

Naggataatigut ukioq frimærkileriffiusoq 2016 naggaserneqassaaq ukiup mappianik, taassumalu ukioq manna nunatsinni frimærkiliat 24-t tamaasa aammalu miniarkiliat sisamat imarissavai.

 

Frimærkit nutaat taakku pillugit annerusumik atuarit POST Greenlandip katersisartunut atuagassiaani, Greenland Collectorimi, taanna PDF-inngorlugu aaneqarsinnaavoq, pissarsiarineqarsinnaavorlu qallunaatut, tuluttut aamma tyskisut ugguuna: www.stamps.gl.

Allanik paasisaqarusukkuit takuuk www.stamps.gl imaluunniit frimærkinut pisortaq Allan Pertti Frandsen +45 61393065-imut sianerfigalugu allaffigaluguluunniit apf@telepost.gl-imut.