Menu

Frimærkit nutaat oqaluttuarisaanermut tunngassutillit

15/09/2020 - 10:58

TELE-POST frimærkinik nutaanik sisamanik ullumikkut saqqummiivoq. Taakkunannga marluk Kalaallit Nunaanni 1930-kkunni sapiiserumatuumik Charles Lindberghimik assiliartaqarput, marlullu kingulliit nangeqattaartunik nutaanik aallartitsinerullutik, tassa Atuarfiup-sparemærkii 1957-imeersut.

Kalaallit Nunaata silaannakkut allakkisartua siulleq

Amerikamiu Charles Lindbergh Kalaallit Nunaata oqaluttuarisaanerani siullersaalluni piffimmiit piffimmut allakkanik timmisartuussisuuvoq. 1933-mi juulip 22-aniit aggustip 26-anut nuliilu Anne Morrow Lindbergh silaannakkut angalapput nalunaaquttap akunnerini katillugit 43-ni, taamaalillutillu Atlantikoq ikaarlugu, Kalaallit Nunaat angallavigalugu Islandimullu ingerlaqqillutik 8.000 km-it ingerlavigalugit.

Kalaallit Nunaanni illoqarfinnit arfinilinnit uninngavigisaminnit allakkanik nassarput. Aappariit Reykjavikimut nunnikkamik allakkat Kalaallit Nunaanni illoqarfinneersut Islandimi allakkeriveqarfimmut tunniuppaat. Allakkat tassanngaanniit Norgemi Bergenimut umiarsuakkut nassiunneqarput, kingornalu Danmarkimi inussaminnut apuunneqarlutik.

Lindberghikkut Kalaallit Nunaata Kujataa tikeraaramikku unnuiffigisaat assilillugu ineeraliaq Qaqortup Katersugaasiviani ullumikkut takuneqarsinnaavoq. Ineeqqami assit taamani assilisat takuneqarsinnaapput, assillu frimærkinut marlunnut najoqqutarineqarsimapput, siulleq tassaalluni inuit arlaliullutik assingat ilaatigut issittumi ilisimasassarsiortartup Knud Rasmussenip assiliseqataaffigisaa, aappaalu tassaalluni Lindbergh timmisartuminiittoq. Timmisartortartuunini, maligassiuisuunini aammalu allakkisartartuunini Charles Lindberghip silarsuarmi ilisimaneqaatigaa.

Atuarfiup-sparemærkia 1957-imeersoq

Sparemærki aallaqqaataani tassaasimagaluarpoq aningaasanik katersaqalernissap siuarsarnissaanut aqqutaasussaq. Dansk Sparemærkekasse 1881-imi pilersinneqarpoq. Atuarfiup-sparemærkiinik 1957-imi saqqummiinikkut aaqqissuussaq Kalaallit Nunaannut tamarmut susassaqarfiulerpoq. Ukiuni arlalinni ingerlasussatut nangeqattaartuliani ukunani frimærkinut tamanut, Alex Secherip titartaqqaagai najoqqutarineqarput.

Frimærkit siulliit marluk takutippaat qajartortoq aammalu Ilinniarfissuup sioraani innuttaasut kalaallisoortut. Nangeqattaartuni frimærkit tamarmik Titartagartalersuisartup Nina Spore Kreutzmannip ilusilersugarai.

Kalaallit Nunaanni frimærkit pillugit allanik atuarit nittartakkatsinni www.stamps.gl

 

Allanik paasisaqarumaguit, inussiarnersumik qinnuigaatsigit frimærkinut pisortatsinnut attaviginneqqullutit uunga: Allan Pertti Frandsen, apf@telepost.gl, tlf. +45 61 39 30 65.