Menu

Greennet.gl atorunnaarsinneqassaaq

20/03/2017 - 13:30

TELE-POSTip 2020-p tungaanut periusissiaata ilaa piuminarsaanissamut, aamma pingaarnertut kiffartuussissutigineqartunut nukiit atorneqarnissaannut tunngasuuvoq. Suliamut tassunga atatillugu e-mailinut systemi greennet.gl-i atorunnaarsinneqassaaq.

Greennet.gl-ip pilersinneqarneranut siunertarineqaqqaartoq tassaasimavoq allakkat elektroniskiusut (mailsit) Kalaallit Nunaanni atorneqarnerulersinnissaat, tamannalu anguneqarsimasoq oqaatigineqarsinnaalluarpoq. Pisariaqartitsineq qangali qaangiussimavoq, taamaattumillu tunisassiaq taanna suli pisariaqartinneqarnersoq apeqquserparput. Periusissiatsinnut atatillugu piuminarsaallutalu suliffeqarfiup iluani sulineq aallukkusupparput. Tamanna tunngavigalugu kiffartuussissut taanna atorunnaarsissallugu toqqarparput, isumalluutillu tunisassianut kiffartuussissutinullu allanut atorlugit. Suliap ingerlanneqarnerani sullitatta toqqissisimanartumik siunnersorneqarnissaat sapinngisarput tamakkerlugu anguniassavarput, tuniniaanermut pisortaq  Brian Smedemark oqarpoq.

 

TELE-POSTip ukiuni arlaqalersuni e-mailinut systemi greennet.gl-i inunnut ataasiakkaanut aamma suliffeqarfinnut neqeroorutigisimavaa.  Kiffartuussissutip atorunnaarsinnissaa TELE-POSTip maanna toqqarpaa.  Greennet.gl pisoqalisooqqavoq, ullumikkullu neqeroorutit pitsaanerusut, pitsaasuullutillu  isumannaatsut, akeqanngitsut arlallit neqeroorutaapput. Tamanna suliffeqarfiup TELE-POSTip pingaarnertut kiffartuussissutaanut pingaaruteqarluinnartunut, soorlu internettimik aamma oqarasuaatinut angallattakkanik tunisassiat suliarinissaannut nukissaqarnerulersitsissaaq.