Menu

Imaatigut kabeli pillugu isumaqatigiissut maanna atsiorneqarpoq

22/09/2016 - 11:41
Imaatigut kabelip tallinissaanut pingaarutilimmik alloriartoqaqqippoq. Tassami sisamanngornermi ullaakkut TELE-POST-ip Nokiamit pigineqartumik suliffeqarfimmik Alcatel-Lucent Submarine Networksimik isumaqatigiissut atsiorpaa. Nuummiit Maniitsoq aamma Sisimiut aqqusaarlugit suliffeqarfiup imaatigut kabelimik sanaartorlunilu pilersitsinissamik akisussaaffeqalerneranik isumaqatigiissut kinguneqassaaq.
 
Siulersuisuni siulittaasoq Stine Bosse oqarpoq:
- Inuussutissarsiorneq siuariartornissanut amerlanernik periarfissaqalissaaq, piginnaasallu annertuninngorneratigut ilinniagaqarnerit peqqinnissaqarfillu piginnaanngorsarnertigut qaffassaaffigissavai. Ineriartornerup pitsaasumik sunniuteqaqataaffigisinnaanera assut nuannaarutigaara, siulersuisuni siulittaasoq Stine Bosse oqaluttuarpoq.
 
Periarfissiissut tatiginarnerpaaq 
Imaatigut kabelip saniatigut Aasianniit Qasigiannguanut aammalu Ilulissanut sakkortusaavimmik annertuumik piginnaasalimmik pilersitsinissaq kiisalu Uummannamiit Upernavimmut sakkortusaaviup maannakkut pioreersup tallineqarnissaa aammattaaq pilersaarutaavoq. Pilersaarut tamarmi taaguuteqarpoq ’Kitaata Avannaani suliassaq’-mik, tamannalu nunatta avannarpasissortaani innuttaasunut 20.000-inut nalunaarasuartaatitigut attaveqaqatigiinnermik pitsanngortitsissaaq.
 
Kitaata Avannaani suliassamut siullermut Alcatel-Lucent Submarine Networksip ilisimasaqarluarnera pissutigalugu sullissisorinissaa tulluarnerpaasimavoq.
 
Pisortaaneq Kristian Reinert Davidsen nassuiaavoq: 
- Suliffeqarfimmik tassannga toqqaasoqarpoq, imaatigut kabelimik ingerlatsinikkut isumannaannerpaamik pitsaanerpaamillu suliaqarsinnaanera pissutigalugu. Isumaqatigiissutip inissilluarneqarnera assut naammagisimaarpara, 2017-imimi pilersitsinissap aallartivinnissaa qilanaarnaqaaq.