Menu

Imaatigut kabelissap sananeqarnera ingerlalluarpoq

16/06/2017 - 13:25

Imaatigut kabelissap sananeqarnera naammassingajalerpoq, misilittarneqassaarlu suut tamarmik pissusissamissut ingerlanerat qulakkeerniarlugu.

TELE-POST-imi sulisut qaammammi uani Frankrigimiipput imaatigut kabelip Kalaallit Nunaannut ingerlanneqangajalersup sananeqarnera takusarlugu. Kabeli katillugit 700 km-it missaannik takissuseqarpoq, kabelillu assigiinngitsut Nuup Aasiaallu akornanni immap naqqinut assigiinngitsunut naleqqussakkat tassani pineqarput.

Ajunngitsumik isikkoqarpoq, umiarsuullu imaatigut kabelimik siaarsisussap Nuummut tikinnissaa, tamatumalu kingorna illoqarfinnut imaatigut kabelilersuiffiusussanut anngunnissaa qilanaaraarput. Sullitatta naggataatigut internetimut pitsaanerusumik attaveqartissinnaanngornissaat nioqqutinillu toqqarneqarsinnaasunik pitsaanerusumik toqqaasinnaanngortinnissaat nuannaarutigaarput, Flemming Drechsel TELE-POST-imi nioqqutinut ataatsimoortunut pisortaq aammalu imaatigut kabelimik suliaqarnermut akisussaanerusoq oqarpoq.

Pilersaarutit naapertorlugit umiarsuaq imaatigut kabelimik siaarsisussaq juulip naanerani Nuummut tikissaaq, qaammallu aggusti Maniitsumut, Sisimiunut aammalu Aasiannut siaarsitsiffigissavaat. Taamaattumik aggustip 31-ani imaatigut kabelip Aasiannut anngunnera nalliuttorsiutigisinnaassavarput. Tamatuma kingorna, tassa septemberimi oktoberimilu suliat allat naammassisarneqassapput. Oktoberimi novemberimilu atortoq tamarmi misilittarneqassaaq, suliarlu taamaalilluni naammassineqarsimassalluni.

Attaveqaateqarnerup sakkortunerusup imaatigut kabelikkut sakoortusaavitsigullu pilersinneqartup kingunerissavaa, TELE-POST-ip 2017-imi decemberip aallaqqaataani internetimut nioqqutinik nutaanik saqqummiussaqarsinnaanera.