Menu

Immakkut atassuteqaat kinguartinneqarpoq

27/11/2015 - 13:50

TELE-POST-imi siulersuisut aalajangiuppaat søkabilimut aamma radiokædimut aningaasaleeqqinnissap aalajangiiffigineqarnissaa aatsaat 2016-p aallartinnerani pissasoq. Tamatumalu nassataanik søkabeliliinissap ukiumik ataatsimik kinguartinneqarnissaa pisariaqalerpoq.

TELE-POST-ip Nuummiit Aasiannut søkabeliliinissaq, Aasianniit Ilulissanut radiokæde suli pitsaaneq aammalu radiokædep Uummannamut Upernavimmullu tallinissaa annertuumik aningaasaliiffigisussaavaa. 

TELE-POST-ip nunatsinni inoqarfinnut innuttakinnerusunut internetimik siammarterineq aningaasatigut ajunaarutigisarpaa. Søkabeli radiokædilu pilersinneqarpata amigartoorut suli annerulissaaq. Mobilikkut attaviit namminersortunut tunniunnerisigut TELE-POST isertitakinnerulissaaq, siunissamilu mobilikkut attaviit aqqutigalugit isertitassat internetikkut atuinermut akikillisaataasinnaassanatik.

TELE-POST-imi siulersuisunut siulittaasoq Stine Bosse ima oqarpoq: Pineqartunut aningaasaliinissaq TELE-POST-imi tapersersornartipparput. Aningaasaliissutilli taamak annertutigisut aalajangiif­figinis­saat naammattumik tunngavilersuutitaqarnissaat pisariaqarpoq.

Stine Bosse nangippoq: Suli ilisimanngisat arlaqaramik. Aningaasaliinissaq annertooq aammalu mobilitigut sullissineq siunissami qanoq isikkoqassanersoq nalunarmata. TELE-POST-imut isertitakinnerulermik nassataqassaaq, taamaattumillu ukiuni tulliuttuni aningaasartuutissagut nalilersoqqittariaqarpagut. Apeqqutaanngilarli aningaasaliisoqassanersoq, apeqqutaaginnarpoq qaqugu aningaasaliineq pissanersoq.  

Kinguartitsinerup malitsigisaanik aningaasaliinissat siusinnerpaamik 2017-mi pisinnaapput. Aalajangiinerup kingorna aatsaat minnerpaamik ukiup affaa qaangiuppat søkabelip inissinnissaa aallartissinnaavoq, taamaammat immap naqqatigut kabeli aamma radiokæde 2016-mi aasakkut sanaartorfiusartumi suliassanut angumerineqarsinnaanngillat.

- Siulersuisuni suliassat pingaarnerit ilagissavaat søkabelip pilersinnissaa, pisortartaassarlu Kristian Davidseni peqatigalugu piareersarnerit ingerlateqqissavavut.

Annertunerusumik paasiniaaffigineqarsinnaavoq TELE-POST-imi siulersuisunut siulittaasoq Stine Bosse uunga +45 21 23 24 25 aamma/imalt. pisortaaneq Søren Lennert Mortensen, uunga 52 53 31 imaluunniit uunga slm@telepost.gl.