Menu

Immap naqqaniittoq kabeli iluarsivoq - immap naqqani kabeli ajutoornikoq alla nassaarineqarpoq

13/03/2019 - 10:40

Sisimiut kujataaniittoq immap naqqaniittoq kabeli pilersaarutaasut naapertorlugit marlunngornerup unnuaani iluarsineqarpoq.

Tassa imaappoq Sisimiuni Kangerlussuarmilu atuisut pingasunngornermi ullup ingerlanerani internet sukkasooq atoqqissinnaanngussavaat.   

Avannaani iluarsaassisoqarnerani teknikerit nuanniitsumik misigisaqarput. Paasineqarpoq Sisimiut Aasiaallu akornanni attaveqanngitsoq. Kinguninngua teknikerit paasivaat Sisimiut avannaatungaani 70 kilometerisut ungasitsigisumi immap naqqani kabeli aamma ajoraluartumik ajutoorsimasoq.

Ilisimaneqanngilaq suli ajutoorneq sumik pissuteqarnersoq. TELE-POST IT Telecomimeersut immikkut ilisimasallit peqatigalugit qanoq pisoqarsimanersoq maannakkut misissorpaat. Imaatigulli kabeli aatsaat qaqinneqarpat susoqarpiarsimanersoq ersernissaa naatsorsuutigineqarpoq. Immap naqqaniittoq kabeli eqqarsaatigalugu TELE-POSTip pisiarinikuugaluarpaa kabeli nunarsuarmi  pisiassani ninngunerpaaq. Aamma inissinneqassammat aalajangerneqassammat immap naqqata pissusaa, aalisarneq sikusarneralu pillugit misissueqqissaarnerit tunngavigineqarsimagaluarput.

Immap naqqaniittup kabelip kittorarsimammat avannaani atuisut internetiat arriitsuaraassaaq attaviit Aasianniit Sisimiunut sakkortusaavikkoormata. 

- Takorlooruminaalluinnaraluarpoq immap naqqaniittut kabelit pingasut ataatsikkut ajutoorsinnaasut kisianni pissutsit piviusut massakkorluinnaq taamaapput. TELE-POSTimi sulisut immikkut ilisimasalinniit ikiorteqarlutik ajutoornerit marluk kingulliit sapinngisannguartik naapertorlugu sukkanerpaamik iluarsiniarsaraat naak sila aporfiusaraluartoq, oqarpoq pisortaaneq Kristian Reinert Davidsen

 

Umiarsuap immap naqqaniittunik kabelinik iluarsaassisoq Nuuliassaaq

Umiarsuup suliassani siulleq naammassereerpaa, Sisimiulli avannaatungaani kabeli ajutoorsimasoq iluarsaakkiartorsinnaanngikkallarpaa siku pissutigalugu. Sisimiut avannaani sikoqartupilussuuvoq aamma qularnarpoq piffissami qanittumi allanngortoqarsinnaanissaa.

Kujataani silap pissusaata takutippaa ulluni tulliuttuni anorersuassasoq taamaattumik Qaqortup avataani umiarsuaq iluarsaassiniartorsinnaanngikkallarpoq. Taamaattumik umiarsuaq Nuummukassaaq avannaani kujataaniluunniit sila aaqqissiiaartorlugu. Sila apeqqutaalluni umiarsuaq avannamut kujammulluunniit immap naqqaniittumik kabelimik iluarsaassiartortinneqarumaarpoq.

- Sila naalagaavoq. Taamaattumik utaqqiinnartariaqarpugut malinnaavigalugillu siku silalu nalilersorlugulu qaqugu sumullu umiarsuaq iluarsaassiartortissanerlugu. Paasisaqarluariarutta nalunaarumaarpugut, taama oqarpoq pisortaaneq Kristian Reinert Davidsen.

 

Apeqqutissaqaruit attaveqaqatigiinnermut immikkoortortaqarfimmi sulisoq Paarnaq Hansen saaffigiuk, mail panah@telepost.gl imaluuniit oqarasuaatitigut +299 563376