Menu

Internetimut nioqqutit nutaat sioqqullugit misileraaneq

22/11/2017 - 14:30

2017-imi decemberimi illoqarfinni tulliuttuni internetimut nioqqutit nutaat TELE-POST-ip saqqummiutissavai: Nanortalik, Narsaq, Qaqortoq, Paamiut, Nuuk, Maniitsoq, Sisimiut, Kangerlussuaq, Kangaatsiaq, Aasiaat, Qeqertarsuaq, Qasigiannguit, Ilulissat aamma Uummannaq.

Taamaaliorneq TELE-POST-ip nioqqutinik pisariillisaanissaq pitsaanerusunillu nioqquteqalernissaq pillugu periusissiaanut naleqquppoq, sullitagullu taamaalillutik sukkassutsinik sukkanernik akiliutigisaminnullu annertunerusumik pissarsiaqarnerussapput.

- Tamanna uatsinnut sullitatsinnullu assorsuaq pissanganartuuvoq. Nioqqutit nutaat imaat akiilu decemberimi saqqummiunnissaat qilanaareqaarput. Digitalinik ineriartortitsinerup peqataaffiginera juullertinnagulu sullitatta nutaarluinnarnik periarfissilernerat TELE-POST-imi akisussaafferujussuarmik tigusaqarfigaarput, pisortaaneq Kristian Reinert Davidsen oqarpoq.

Interneti misilerarneqassaaq
Tamatuma piareersarneqarnerata ilaatut internetimut nioqqutit nutaat atulernissaannut atortulersuutit atorneqartussat saqqummiussinissap tungaanut TELE-POST-imit misilerarneqaqqaassapput. Tamatuma kingunerissavaa, Nuummi aammalu Qaqortumi TELE-POST-ip nioqqutaanik Internet ANNEQ 10/2 Mbps-imik atuisorpassuit piffissap ilaani sukkassutsinik sukkanernik atugaqarnissaat. Misileraanerit naammassineqareeriarpata nalinginnaasumut tamanna uteqqissaaq.

Tusass
Internetimut nioqqutit nutaat saqqummiunneqassapput taaguut Tusass atorlugu. Tusassimik atuinerup ilisarnaatigai imminut sullinneq, siumoortumik akiliineq, pisariitsuuneq toqqissisimanerlu. Oqaatsillu pingaarutillit tamakku Tusass internetimik atuisunngornerit nutaat aamma ilisarnaatigissavaat. Taamaalilluni siunissami nittartakkakkut ataasiinnavikkut, tassalu www.tusass.gl-ikkut, mobilimik internetimillu atuisuuninni pisariaqartitatit tamaasa pissarsiarisinnaalissavatit.

www.tusass.gl-imi mobilimik atuisuuffeqarnermut nutarterinerigut nutaarluinnaat pillugit maannangaaq atuarsinnaavutit, Tusass mobilinnullu atuisooreersimaguit decemberimi interneti atuisuuffinnut tassunga pisariitsumik ilanngussinnaalissavat.