Menu

Internettimut attavik unnuaru qaminneqassaaq

03/05/2019 - 17:31

New Yorkip avannaatungaani New Havenimi kabelit katersuuffiat aserorsimammat unnuaru iluarsaanneqartussanngorpoq.

Nunatta kujataani immap naqqatigut kabelip piffissami matumani ajoquteqarsimanngitsuuppat, TELE-POST-ip internettikkut attavinnik allannguinermigut attavik Islandimeersoq atorlugu attavilersinnaagaluarpaa. Massakkulli pissutsit taamaatsillugit periarfissaqanngilaq. Taamaattumik internettikkut attaviit tamarmik qaminneqassapput.

Attaveerukkallarnissap piffissaa

Iluarsartuussinissaq akunnerit arfineq pingasut tikillugit sivisutigissangatinneqarpoq, tassa arfininngornerup ullaassaani nal. 03.00-imit  11.00-p tungaanut.

Pisinniarfinni tamani kortinik akiliisarfiit piffissami tassani attaveqassanngillat. Taamaattumik TELE-POST-ip atuisuni kaammattorpai aningaasanik tigusereeqqullugit, soorlu unnuami taxanut ullaakkorsiutinulluunnit pisiniarniartunut eqqanaarisoqarniassammat.

 

Atuisut eqqorneqartut

Nunatta kujataani atuisut angerlarsimaffimminni DSL-mik internettillit aamma avannaani tunumilu satellitsikkut attavillit iluarsaassisoqarnerani eqqugaassanngillat.

Nunattali sinnerani internettimut attaviit qaminneqarpata tamanna malugineqarsinnaassaaq.

Oqarasuaatit tamarmik sillimaniarnermullu attaveqaatit naliginnaasumik attaveqassapput.

Nuna tamakkerlugu mobilinik atuisut internettemut 3G-mut 4G-mullu attaveqassanngillat.

Roaming aamma eqqorneqassaaq, atuisut nunani allaniittut oqarasuaatitik iluarsartuussisoqarnerata nalaani atorsinnaassanngilaat. Taamatuttaaq atuisut nunanit allaneersut

Nunatsinni attaveqassanngillat, matumani pineqarput, sianerneq, SMS/MMS aamma Internettimik atuineq.

 

TELE-POST-ip pisiortorfigisartagaata New Havenimi kabelip katersuuffiata iluarsaanneqariasaartussanngornera pissutigalugu – piffissarlu sivikitsuinnaq atorlugu taamatut nalunaaruteqarneq TELE-POST-imit ajuusaarutigineqarpoq.