Menu

Inuiaqatigiit amerlanersaasa sukkasoorujussuarmik internetsikkut aqqutilersornerat TELE-POST-ip qulakkeerpaa

12/10/2019 - 09:22

Inuiaqatigiinni 92 %-tinit amerlanerusut, illoqarfinni minnerni aamma nunaqarfinni, sukkasoorujussuarmik internetsikkut aqqutilerneqarsinnaanerat TELE-POST-ip maanna periarfissaqartilerpaa. Suliniutip Mobile Firstip 2016-imi siulersuisunit aalajangiunneqartup 2020-tiutinnagu innuttaasut 92 %-tiisa sukkasoorujussuarmik internetsikkut attaveqarsinnaatilernissaannut siunertaasa angunerisigut tamanna periarfissiuunneqarpoq. Siunertaq tamanna maanna anguneqarpoq.

TELE-POST-imi pisortaaneq Kristian Reinert Davidsen tamanna pillugu ima oqarpoq:

- Tulluusimaarutigalugulu nuannaarutigeqaarput kalaallit inuiaqatigiit amerlanerpaartaat maanna periarfissaqalermata sukkasoorujussuarmik interneqarlernissaminnut. Tamanna allorijarnerujussuuvoq TELE-POST-imut suliffittut, nunamullu tamarmut digitalimut kivitsinerulluni, periarfissarpassuarnik digitaliusunik ammaassisoq”. Nangipporlu:

- TELE-POST-ip nunarsuq Kalaallit Nunaannut attavilerpaa – Kalaallit Nunaallu ulloq unnuarlu nunarsuarmut ammajuaannartilerlugu. Imaatigut kabileqalernissamut aningaasaliiniarneq takorluugaasimavoq angisoorujussuaq, maannalu kinguaariit tullinnguuttut periarfissarpassuarnik nutaanik ammaanneqarput.

- Sumiluunniit najugaqaraluaruit sumiiffiit qimannagu ungasissumit ilinniartinneqarsinnaalissaatit, nunarsuarmioqatigiit maannakkorpiaq nuannaartorisaat malinnaaffigisinnaalerlugit aamma digitalip malissuartut nunarsuup sinnerani ineriartorneranut Kalaallit Nunaat maanna akuulerpoq”, Kristian Reinert Davidsen naggasiivoq.

Qaammataasatigut tigooraaffeqarfinni pitsanngorsaalluni aaqqiissutissanik TELE-POST sulissuteqarlunilu aningaasalersuivoq. Tamakkunanili imaatigut kabeleqarfiusut assigisaannik sukkaqataannillu aaqqiisoqarsinnaanera ilimagineqarsinnaanngilaq, kisianni sumiiffinni tamakkunanissaaq qaammataasanut attaavinnut pitsanngorsaatinik sulisoqarpoq aningaasalersuisoqarlunilu.

Internetsikkut nioqqutissiaq Tusass TELE-POST-imut aamma atuisartunut torrallataavoq ajunngilluinnartoq. Sukkasoorujussuarmik internetseqarneq Tusass’-ikkut ajornannginnerulerlunilu atoruminarnerulersimavoq, soorlulittaaq akilersuisarneq qularnannginnerulersimasoq. Tuss internet pillugu annertunerusumik uani atuarit: Tusass.gl

Sukumiinerusunik paasisaqarusukkuit attaveqaqatigiinnermut pisortaq Julie Rademacher attaviguuk, julie@telepost.gl; tlf.+299 26 35 35