Menu

Johannes Blidstrand, Kommune Kujallermit nersornaaserneqartoq

25/06/2021 - 16:24

Johannes Blidstrand Qaqortumeersoq Coding Classimi Kalaallit Nunaanni pissartanngorniunnermi 11. juuni, Danmarkimilu Coding Classimi ajugaaniutivinnermi 23. juuni ajugaasoq, ullumikkut 24. juuni Kommune Kujallermi kommunalbestyrelsenit nalliuttorsiutigineqarlunilu nersornaaserneqarpoq.

Kommunalbestyrelsep, bogmesteri Stine Egede siuttoralugu Johannes Blidstrand nersornaammik, 2000 kr.-mik aningaasartalimmik, Qaqortumi Kommune Kujalliup allaffiani ilasseqatigiittoqarnerani tunissuteqarfigaat. Ilasseqatigiinnermi Johannesip spilliliani ajugaassutigisani, ”Ocean Guardian” kommunalbestyrelsenut isertunullu allanut takutippaa. Spilliliaa plastikkinik katersuinermut-, eqqakkanik ikilisaanermut-, imaanilu uumasunik illersuinissamut tunngasuuvoq.

Kommune Kujallermi Bogmesteri Stine Egede nersornaammik tunisinermini Johannesimut ima ilaatigut oqaaseqarpoq:

-Koderinermik siullerpaamik ilinniartitsineq ukioq manna TELE-POSTip kommunellu suleqatigiinnerisigut iluatsissimavoq. Koderineq Kujataani nutaajugaluartoq, Johannesip koderinermi Kalaallit Nunaanni pissartanngorniunnermi, Danmarkimilu ajugaaniutivinnermi ajugaanera nalaatsornerinnaanngilaq. Angusai assut tulluusimaarutigaavut, sammisamullu pikkorilluinnarnini ajugaassutigaa. Tamanna malunnartinniarlugu kommunep Johannesimut nersornaat tunniuppaa, neriuutigalugu piginnaanini siunissami ineriartorteqqikkumaaraa, takusaqarfigeqqikkumaarippullu. Bogmesteri Stine Egede nuannaarluni taama ilaatigut oqaaseqarpoq.

Johannes Blidstrandip arnaa, Sensi Blidstrand ernermi kommunemit nersornaaserneqarneranut killitsissimasoq ima oqarpoq:

- Ilimagisimanngikkaluarpara Johannes Danmarkimi ajugaaniutivinnermi ajugaajumaartoq, kisianni tulluusimaarutigeqaara nuannaarutigalugulu koderinermut taama pikkoritsigimmat. Atuarfimmi matematikkimut pikkoreqaaq qarasaasiamillu ajornartorsiuteqaleraangama ikiuillaqqittaqaluni, soorlu inuusuttorpassuit allat aamma taamaattut.  

Johannes, kommunemit nersornaaserneqarnerminut tulluusimaarlunilu nuannaaqisoq ima oqarpoq:

- Nuanneqaaq. Atisanut timersuutinut oorit atorumaarpakka, atuaqatikkami ilagalugit qanittumi tammaarsimaariassagatta. Ulluni qaninnerni aamma akunnernik tallimanik sivissususilimmik arpannissamut peqataasussaavunga, Johannes sunngiffimminimi aamma timersortartoq taama oqarpoq. 

Johannes Blidstrandip koderineq aqqutigalugu ’Ocean Guardian’ spilleliarisimavaa, FN-ip Nunarsuarmut anguniagaasa nr. 14-at aallaavigalugu. FN-ip Nunarsuarmi piujuartitsinissamut anguniagai 17-t 2030-p tungaanut inunnut avatangiisinullu pitsaanerusumik ineriartortitsinissamut anguniagaqarluni ingerlanneqarput.

TELE-POSTimi Sulisoqarnermullu Immikkoortortami pisortaq Helena Rotvig Kristiansen, Kommune Kujallermut suleqatigiinneq pillugu akissuteqarpoq: 

-  Inuusuit kinguaariinni tullinnguuttut ilinniagaqartinnissaannut uagut suleqataassagutta, kommunenik qanimut suleqateqarneq pisariaqarluinnartuusoq qularutigineqassanngilaq. Pikkorissunik nassaarlutalu ineriartortitsissagutta, digitalikkullu pilersitsisinnaassutsimut piginnaasaqarneq siammarsassagutsigu tamanna pingaaruteqarpoq. Nuannaaqaanga Coding Classimut tunngatillugu suliffeqarfittut iliuuseqaratta, isumalluutinillu annertuumik atuiffipput pitsaasumik kinguneqarmat. Tamatumalu siammarnissaanut pingaaruteqarluinnarpoq, nuna tamakkerlugu kommunenik eqeersimaartumik pisussaassuseqartumillu suleqateqartarnissarput.

Kingullertullu qujanarujussuaq – Qaqortumi naapinnerit nuanneqaaq neriuppunga ajunngitsutit.

Paasisaqarnerorusunnermi attavissaq: Attaveqaqatigiinnermut pisortaq Julie Rademacher mobil 263535 email: julie@telepost.gl