Menu

Juullimut allakkat juullinnginnerani apuukkumaarput

20/12/2016 - 16:47

Juulleriartornera Facebookikkut, Twitterikkut assigisaatigullu malunnartinneqartaraluartoq, suli atuisunit allakkatigut juullimut pilluaqqussutinik poortukkanillu nassiussinissaq pingaartinneqarpoq.

Decembarip ingerlanerani TELE-POST-ip poortukkanik 10.000-inik kiisalu allakkanik pilerisaarutinillu katillugit 400.000-it missaanniittunik agguaanissani naatsorsuutigaa. Allakkat poortukkallu nassiunneqartartut amerlassusaat malunnaatilimmik 8 %-ip missaanik appariarsimapput.

Nassiussiffissaq kingulleq tikitsinnagu nassiunneqarsimasut juullinnginnerani apuuffissaminnut apuunnissaat naatsorsuutigaarput. Allaallumi piffissamik qaangiisoorsimagaluartut nassiussaasa ilaat juullinnginnerani apuunnissaat naatsorsuutigaarput.

Pakkeautomatit juulleriartornerani aamma iluaqutaapput

Illoqarfinni TELE-POST Centerini atuisunut pakkeautomatit neriuutigaarput oqilisaataasut. Naluneqanngitsutut ammasarfitta avataatigut pakkeautomatit atorneqarsinnaapput poortukkanik aallernermut. Ajoraluartumilli poortukkat tamarmik pakkeautomatini inissaqartinneqanngillat, TELE-POST-imiillu sapinngisamik poortukkat amerlasuut pakkeautomatinut inissinniartassavagut.

Atuisuvut pakkeautomatini poortukkanik aasassaqaleraangata sapinngisamik sukkasuumik e-mailikkut SMS-ikkulluunniit nalunaarfigisassavagut.

Juullikkunni allagarsiassat pillugit apeqqutissaqaruit, illoqarfigisanni TELE-POST Centerimut saaffiginnissinnaavutit.

TELE-POST-ip sullitani tamaasa juullisiorluarnissaannik ukiumullu nutaamut iserluarnissaannik kissaappai.