Menu

Kabelip ajoqutaa internettip kigaanneranut pissutaavoq

27/12/2018 - 17:10

TELE-POST´p immap naqqani kujammut aqqutaani ajutoorneq piffissami sivisuumi internettip arriinnerusumik ingerlanissaanut pissutaassaaq

Tallimanngornermi ullaakkut nalunaaqutaq 06.30 missaani Qaqortup avataaniittoq Islandimut imaatigut kabeli aserorpoq.

Kinguneranik internet kingaallivoq aamma peqataanik nunatta kujataani radio, tv nalunaarasuartaateqarnerlu sivikitsumik kipisaqattaalerpoq.

Kujataani arriitsumik ingerlaneq 

Amerikami avannarlermi nalunaarasuartaateqarnermut aqqutit atorlugit oqarasuaatikkut allatigullu aqqutit tamarmik ingerlatinneqarput, Islandimulli imaatigut kabelip ajoqusernera pissutaalluni ulluni tullerni Nunatta Kujataani  atuisut misigisassavaat internetti arriitsuararsuusoq.

Tamatumunnga pissutaavoq avannaaniit paasissutissanik aallertalertariaqartalerneq, imaatigut kabelip kujammukaartup atorsinnaannginnera pissutigalugu qarasaasiamut aqqutit pisinnaanikinnerusut aqqutigalugit. 

Qarasaasiat aqqutaannik iluarsaasartugut ulapipput kabelip aserortup kinguneranik akorngutaasut minnerpaatinniarlugit qarasaasiamut aqqutit allanngortiternerisigut. Internettimilli atuisartutta sualummik ulluni tulliuttuni misigisarumaarpaat ajoraluartumik internetti arriinnerusoq. 

 Itisoorusarmi

Pissutsit imaaliallaannaq iluarsineqarsinnaanngitsut pissutigalugit iluarsaassinissaq sapaatip akunnerinik arlalinnik sivisussuseqarumaartoq naatsorsuutigineqarpoq.

Tamatumunnga pissutaavoq umiarsuarmik kabelimik usisumik aggersitseqqaartariaqarnissaq aamma tamatuma kingorna kabeli 3.000 meterisut ititigisumiittoq "qaqinneqaqqaartussaavoq isui marluk iluarsaassassat nassaariumallugit. 

Atuisut ataasiakkaat attaveqanngillat.  

Ajornerpaamik eqqorneqarput Nanoq Mediap internettimik atuisui, taakku ajoraluartumik massakkorluinnaq attaveqanngillat. 

Sulliviup TELE-POST-imiit internettimik pilersorneqarnissaminik toqqaasimanera pissutaavoq, attavik taanna Islandimeerpoq taamaasillunilu imaatigut kabelimut avannaaneersumut attaveqartussanngorlugu allanngortinneqarsinnaanani. 

Teknikerigut aamma immikkut aaqqiissutissamik nassaarniarlutik sulipput, Nanoq Mediami pisisartut internettimut attaveqaqqilernissaat qulaarnaarumallugu. 

Pisisartut malinnaasinnaapput TELE-POST-p nittartagaatigut Driftsinformationip ataani.  

 

Apeqqutissaqaruit oqaaseqatitsiumaguilluunniit attaveqaqatigiinnermut sulialik Niels Krogh Søndergaard attavigisinnaavat uunga sianerlutit   +299 54 87 12.