Menu

Kalaallit Nunaanni akiusoq assigalugu nunani avannarlerni tamani mobilit atortuk

24/05/2018 - 08:30

1. juni 2018 roamingernermi sulississut nutaaq Tusass-ip saqqummiutissavaa, taannalu taaguuteqarpoq Tusass nunani allani. Tusass nunani allani atorlugu, Kalaallit Nunaanni akit assingi malitassallu atorneqartut atorlugit, mobilit datamut, sms-ernermut aammalu nunanut avannarlernut taakkunanngaanniillu sianernernut atorsinnaavat.

Tusassip nunat avannarliit tamaasa isumaqatigiissusiorfigai, taamaalillutit mobilit datamut, sms-ernermut aammalu nunanut avannarlernut taakkunanngaanniillu sianernernut atorsinnaalerpat – immikkut saniatigut akiliuteqanngitsumik - Tusass mobilimik atuisuuffeqarsimaguit qaammammut 499 kr.-ilimmik aammalu tassannga akisunerusumik. Imaappoq, Tusass nunani allani atorlugu immikkut saniatigut akiliuteqanngitsumik ass. Kalaallit Nunaanniit Danmarkimut sianertoqarsinnaavoq aammalu illuata tungaanut, aammali ass. Savalimmiuninngaanniit Sverigemut sianertoqarsinnaavoq aammalu illuata tungaanut.

Tusassillit tamarmik, qaamm. 499 kr.-ilimmik tassanngaluunniit akisunermik atuisuuffillit, juunip aallaqqaataaniit 2018 mobiliminnik atuisuuffigisisaminnut ilanngullugu, roamingimut sullississut nutaaq pissarsiarissavaat – automatiskimik aammalu immikkut akiliuteqartinneqarnatik.

Taamatut ittumik atuisuuffeqanngikkuit, nutaamik Tusass-mobilimut atuisuuffittaarsinnaavutit imaluunniit maannakkut Tusass-mobilimut atuisuuffiit qaamm. 499 kr.-ilimmut taassuminngaluunniit akisunermut allanngortissinnaavat, taamaalillutillu Tusass nunani allani iluataatigalugu.

- Tusass nunani allani atorlugu sullitatta attaveqaateqarnermi nioqqutinik pitsaanerusunik akikinnerusunillu neqeroorfiginerat ingerlateqqipparput, taama oqarpoq TELE-POST-imi pisortaaneq Kristian Reinert Davidsen.

Tusass, TELE-POST-ip ataani ussassaarutaavoq aammalu tamanna ilutigalugu siunissami attaveqaateqarnermi TELE-POST-imit nioqqutaasussaasoq.

- Roamingimik sullississutitta nutaap nunat akornanni killeqarfiit atorunnaarsippai, taamaalillutik sullitagut nunani allani angalareerlutik angerlarunik akiligassanit akisoorsuarnit tupaallatsinneqassanngillat.

Pisortaaneq nangippoq:

- Roamingerfiusinnaasumik annertusaajuarnermik aammalu nunani allani sullissisunik, neqerooruteqartuusunik ingerlatseqatigiiffinnillu nutaanik isumaqatigiissusiornernik, Tusass suliaqartuaannavippoq. Piffissap ingerlanerani taamaattumik nunat allat aamma Tusass nunani allani-mut ilanngunneqarumaarput.

Kalaallit Nunaata saniatigut nunat avannarliit tassaapput: Danmark, Finland, Savalimmiut, Island, Norge, Sverige aamma Åland.

 

www.tusass.gl -imi paasisaqarnerugit