Menu

Kalaallit Nunaanni tamarmi 4G

08/11/2018 - 11:00

TELE-POST-ip nunaqarfik kingulleq 2G-miit 4G-mut nutarteriffigeqqammerpaa. Attaveqaat nutaaq taanna 5G-mut piareeqqareersuuvoq.

Pingasunngorneq 7. november Qeqertami mobilillit kingullertut 4G-mobildatamut manna tikillugu sukkassusaasumit hundredelinnik arlalissuarnik sukkanerusumut attavilerneqarput (ilanngussaq takuuk).

Kalaallit Nunaata 4G-mik mobilinut attaveqaataata nutaap, maanna Avannaani Siorapalummiit Nunatta Kujataani Aappilattumut isorartussuseq 2.500 kilometeri aammalu Tunumi sineriak attaveqartilerpaa.

Mobilit attaveqaataat sukkasoorsuaq
TELE-POST-ip periusissiaani anguniakkat ilagaat innuttaasut 92 procentiisa 2020 nallertinnagu sukkasuumik interneteqalernissaat, Mobile First-illu suliarineqarnerata naammassisarneqarnerani innuttaasut 92 procentii ullumikkut mobildatami sukkassutsit Europami sumiiffinnit amerlanernit sukkanerusut atorsinnaalerpaat.

- Neriuutigissallugu qunugisimavara attaviup taama sukkatigisup najugaqarfinnut taama amerlatigisunut ukioq manna naammassisimanissaa, pisortaaneq Kristian Reinert Davidsen oqarpoq.

- Attaveqaatip pitsanngortinnissaa maanna aallartissavarput, aamma nunami innuttaasunut tamanut nioqqutit nutaat periarfissarsiuunnissaat paasiniassavarput, pisortaaneq oqarpoq.

 

 

Piumaneqarnera annertusisoq
Nunatsinni sumiiffinni assigiinngitsuni 119-ini TELE-POST-ip, Ericssonip aammalu AK Montagep qaammatit arfinilissaat avillugu sivisussusilimmik mobilinut antennet taarsersorpaat. Nunatta silaannakkut attaveqaataa nutaaq siunissamut qulakkiigaavoq, tassa 5G-mut qaffatsinneqarsinnaagami. Attaveqaat nnuttaasunut suliffeqarfinnullu iluaqutaasussanik attaveqaqatigeeriaatsinik nutaanik ammaassissaaq.

Qaammataasakkut attaveqarfinni 4G
TELE-POST-ip sullissaasa 8 procentii Tunumi aammalu Qaanaap eqqaani najugaqarput. Tamaani mobilillit qaammataasakkoorlugu attaveqaatikkut sukkaannerusukkut 4G-qalissapput. Sumiiffinni qaammataasakkut attaveqartuni TELE-POST-ip sullissaasa taamaattoq iluaqutigissavaat Upernaviup eqqaani innuttaasut qaammataasakkut attavimmik tigooraajunnaarnissaat. 8 procentit taakku mobilinut attaveqaammik pitsaanerulersitsissapput, taamaattorli nunap sinneranut naleqqiullugu suli sukkaannerungaatsiartussaassaaq qaammataasakkoortuunera pissutigalugu (4G qaammataasakoortoq pillugu ilanngussaq takuuk). Sumiiffiit tamakku attaveqaataasa pitsaassusaanik pitsanngortitsisussanik aaqqiissutissanik suli suliaqartoqarpoq.

Allanik paasisaqarumaguit attaveqaqatigiinnermut suleqataasoq Niels Krogh Søndergaard attavigisinnaavat uunga: niks@telepost.gl, tlf. 54 87 12.