Menu

Kapisillit attaveqaammi nutaami siulliupput

04/05/2018 - 10:00

TELE-POST-ip angallattakkanut wifi-mullu attaveqaammi nutaarluinnarmi misileraaneq aallarteqqammerpaa. Kapisilinni innuttaasut piffissami tullermi attaveqaatip nutaap sukkasuullu misilerarneqarnerani ikiuutissapput.

Ericssonimit atortut nutaanerpaat atorlugit nunatsinni innuttaasunut tamanut ledningeqanngitsumik 4G-mik attaveqaateqalernissamut alloriarneruvoq siulleq.

Tamanna pivoq TELE-POST-imi aqutsisut siulersuisullu maajip aappaani Kapisilinni innuttaasunik kaffisoriartoqqusimmata modem-inillu misiliutaasussanik agguaassimmata. Nunaqarfiup atuarfia Mobile First-imik suliaqarnermut nalliuttorsiorpalaartumik aallartitsinermut sinaakkusiisuuvoq, ukiullu sinnerani aappaagulu nunatsinni illoqarfinni nunaqarfinnilu tamani antenneqarfiit taamaattut ikkussuunneqassapput.

Suliassaq angisooq
- Kapisilinni atortut nutaarluinnaat atulernissaannut ikitsisinnaasimanerput tulluusimaarutigeqaara. Misigisaq immikkut illuinnartuuvoq, pisortaaneq Kristian Reinert Davidsen oqarpoq.

- Nunatsinni sumiiffinni amerlasuuni attaveqaatigut piffissami sivisuumi nutarterneqarnissamik pisariaqartitsisimapput ineriartornermut malinnaaniassagunik. Teknologiinik aammalu pilersuinermi sukkassutsinik nutaarluinnarnik suliami tassani eqqarsaatiginnittariaqarsimavugut. Tamannalu isumaqarpoq, nunatsinni illoqarfiit nunaqarfiillu tamarmik antenneqarfiisa ilaat 119-it 2018-imi aammalu 2019-imi 4G-mik atuisinnaanngorlugit qaffatsinneqassasut.

Alloriarnissaq tulleq  
Kapisilinni innuttaasut attaveqaammik nutaamik misileraanermut peqataarusuttut mobiliminnut simkortimik imaluunniit modem-imik ledningeqanngitsumik nutaamik atornissaminnik periarfissinneqarput. Nunatta sinnerani antenninut atortunik siaarterineq juunip aallaqqaataani aallartinneqassaaq.

Suliaq Mobile First tassaavoq nunatta attaveqaasersugaaneranik TELE-POST-ip pitsanngorsaanera annertooq, anguniagaavorlu sullitatsinnut tamanut ledningeqanngitsumik interneteqalersitsinissaq aammalu pitsaanerpaamik angallattakkanut signaleqartitsilernissaq.