Menu

Kofoeds Skole 100.000 kr-inik tunineqarpoq

05/03/2020 - 15:36

Frimærkip 2017-meersup nalingata ilassutaanit sinneqartoorutit Nuummi Kofoed Skolep sulineranut atorneqartussanngorlugit TELE-POST-imit qulakkeerneqarput.  Frimærki saqqummeramili Nunatsinni nunarsuarmilu tamarmi frimærkinik katersisartunut tunisaalluarsimasoq eqqumiitsuliortumik tamatigoortumit Miki Jacobsenimit kusarnarluinnartumik titartagaavoq.

Frimærkip nalingata ilassutaanit iluanaarutinik Kofoeds Skolemut tunniussinermi TELE-POST-imi Frimærkilerinermut pisortaq Allan Pertti Frandsen ima oqaaseqarpoq:

- 2017-imi aalajangerpugut frimærkip tuniniarnerata iluanaarutissartaasa Nuummi Kofoeds Skolep isumaginninnermik sulineranut Kalaallit Nunaannilu atuarfiup ingerlataanut atugassanngorlugit tunniunneqassasut. Atuarfiup ilinniartuisa sulisuisalu aningaasanik tapiiffiginneqarnissaannut tulluarnerusoqanngilaq.

TELE-POST ukiut tamaasa immikuullarissumik frimærkiliaata nalinganut ilassutaanit iluanaarutaasut Kalaallit Nunaanni ajunngitsuliornermut kulturilerinermulluunniit atugassanngortinneqartarput. Tunniussaq Nuummi Kofoeds Skolermiunit tulluusimaarutigineqarpoq. Atuarfiup suliniutinut pisortaa Gudmundur ’Gujo’ Thorsteinsson ima oqarpoq:

-Tamatta sinnerluta, ilinniartullu, sulisullu allallu Nuummi Kofoeds Skolemut attuumassuteqartut TELE-POST pisiniartartuilu qujaffigerujussuarniarpakka. Aningaasarpassuit, maanna tunniunneqartut atuarfiup sulinngiffimmi sammisassaqartitsiniarneranut iluaqutissatut atorneqassapput.”

Frimærkit pillugit paasissutissat sukumiinerusut uaniipput:  https://stamps.gl

 

Paasissutissanik apeqqutissaqaruit attaveqarfissat:

Frimærkinut pisortaq Allan Pertti Frandsen, +45 61393065, apf@telepost.gl

Kofoeds Skole Nuuk, Gudmundur "Gujo" Thorsteinsson oqar.: +299 580226, gujot@kofoedsskole.gl